Read Biblija - Pe Baltitko Romani čib (Romanes) 2019 Baltic Romani Bible Psalmy 50 Bible Online

Psalmy 50 - Biblija - Pe Baltitko Romani čib (Romanes) 2019 Baltic Romani Bible bible

Psalmy 50

¹[49-r.s.] Asafoskiro Psálmo. Devél devlengiro, Sarezorjákiro Raj Devél phendiá i kharéla sarí phuv jagoróstyr, kaj kham uštéla i ke jagóro (krajo), kaj kham džála telé.

²Sionóstyr, bidošengire šukaripnastyr, Devél zaziaindia.

³Amaró Devél javéla i Jov isyn na štyl; jag, saví xála saró, džála angíl Léste i javéla drieván štormitko balvál.

⁴Jov prikharela Bolybnáskiro Rajo vučipnástyr i phuv te sendiakirél Léskire manušén:

⁵“Skéde Miren sventonen khetané ke Me, savé kerdé Zavieto Mánca sventoné dyibnasa (žertvasa).”

⁶Mek te phenél Bolybnáskiro Rajo sarénge pal léskiro čačipén, so Devél Kokoró isyn sendári! Séla.

⁷“Šunén, Miré manušále; i Me javáva te rakiráv. Me javáva te dophenav pe túte, o Izráilie, Me som Devél, som tyró Devél!

⁸Me na javáva drieván te bangiakirav tut pal tyré svénta dyibená, ci pal xačkiribnaskire svénta janybená, savé isyn usady (sak) angíl Mánde.

⁹Me na javáva te lav guruvén tyré kheréstyr ci buznen (kozlen) tyré ĥurtendyr,

¹⁰pal-dová so kažno riskiribnáskiro murdál (zvierjo) dro veš isyn miro, i murdál pe bérgi, savé isyn tysjoncy.

¹¹Me džinóm (džináv) saré čiriklien bergendyr i saré murdalén (žyvotnonen) pir Miré féldy jone isyn Miré:

¹²“Kóli me javavas bokhalo, me na phenavas Túke: pal-dová so svéto isyn Miro i saró, sósa jov isyn pherdó.

¹³Ci Me xava guruvengiro mas, ci Me pjava buznengiro rat?

¹⁴Jan svénto dyibén parikiribnasa Devléske i otdé pale Naj Vučedyreskireske, pal so tu dyján sovláh.

¹⁵I khar Man dre dyvesá, kiéli Túte isyn bari dar, i Me zrakháva tut, i tu barjakiresa ke vučipén Man.”

¹⁶Ne Devél rakiréla fujé manušéske: “Sóske tu rakirésa sarénge pal Miré statúty, i rakirésa péskire mósa pal Miro Zavieto?

¹⁷a usajékh túke drieván isyn na pir iló Miro sykliakiribén pal čačipén i tu čhurdesa Miré lavá pal péste?

¹⁸Kiéli tu dykhésa čores, tedy tu zdžasape lésa i tu sánas khetané odolenca, savé keréna biladžaipén.

¹⁹Tu désa vólia péskire moske te rakirél čoripén i péskire čibake (čibjake) te sčhuvel xohaibén.

²⁰Tu san beštó i rakirésa pe péskire pšaléste: tu bangiakiresa xohanés tyré-dákire čhavés.

²¹Tu kerdián Davá i Me sómas štyl (tiho); tu dumindian, so Me som adasavó, syr tu san. Ne Me sykaváva tyrí bang i čhuváva davá jekh pal jekh angíl tyré jakhá.

²²Poduminen pal davá tumé, kon bistrela Devlés, sob (kaj) Me te na roskušav tumen, so na javéla nikonés te zrakhél tumen.

²³Kon parikirela Devléske sventoné janybnasa, kodová slavinela Man i Me sykaváva léske, syr Devél zrakhéla les, i savó pridykhela pal péste te dživél pir čačipén.