Read Biblija - Pe Baltitko Romani čib (Romanes) 2019 Baltic Romani Bible Psalmy 55 Bible Online

Psalmy 55 - Biblija - Pe Baltitko Romani čib (Romanes) 2019 Baltic Romani Bible bible

Psalmy 55

¹[54-r.s.] Xoróskire Dirižoróske pe Balytka Strumiénty. Sykliakiribén. Davidóskiro Psálmo.

²O, Dévla, pričhúv kan ke mirí pátieri (modla) i na garadjov, syr me rovava:

³šun man i otphen mánge: me psirava péske i ladžava péstyr

⁴vergéngire zaniendyr i fujé manušéndyr, savé tasavena man. Jone čhuvéna bang pe mánde i bidykhena man dre xolý.

⁵Miro iló dukhala andrál mánde i meribnaskiri dar pyjá pe mánde,

⁶me izdrava i trašaibén javdiá pe mánde, i man obuhtyldia bari dar.

⁷I me phendjom: “Kon délas phaká (kryly) mánge syr golumboske? Me tedy vurniavas krig i otkhinjovavas,

⁸ake, me durjovavas dur, i me jačavavpe te dživáv pe čhučí phuv (pustynia). Séla.

⁹Me sygnjovava te zrakhavpe zoralé balvaliatyr i baré štormostyr.”

¹⁰Phagir len, o Rajo Dévla, roskér léngire čibá (čibjá); pal-dová so me dykhcjom, savé jone isyn nahráta (nasil'niki) i košenape;

¹¹jone psiréna pir fóro pir léskire vánty, dyvesé i ratý jone keréna čoripén i pharipén jekh jekhéske,

¹²hasibén isyn maškirál davá fóro, xohaibén i tasaiben isyn usady (sak) pe léskire vulícy (gásy).

¹³Pal-dová so davá isyn na vérgo, savó obrakirela man, me davas ráda te lydžav davá: ci javélas adasavó manúš, savó bidykhela man i ĥazdéla pes šaribnasa pe mánde, me garadjovavas léstyr,

¹⁴ne davá tu san, kadasavó syr me som, miro mal i miro pindžkirdo manúš,

¹⁵konesa ame gudles rakirdiam saré iléstyr i savésa ame psirdiam khetané javire skoposa manušengiresa dro Devléskiro Kher.

¹⁶Mek meribén te uhtylel len. Mek jone džidé te džán telé ke štéto, kaj isyn liúno (ado). Čoripén isyn dro léngiro kher i iló.

¹⁷Ne me kharáva Devlés te pomoginel mánge i Raj Devél zrakhéla man.

¹⁸Bel'veliénca, tasiarlénca i dyvesénca me javáva te žalinavpe i te izdrav roibnasa, i Jev javela te šunél mirí zan,

¹⁹i Jov vyrakhela miro di ramanjosa maribnastyr, so lydžiné pe mánde, so isyn but len proti mánde.

²⁰Devél javela te šunél i otphenéla lénge, davá Jov, Savó isyn pe trono pe saré viéki. Séla. Ne jone na parudjona, nane lénde trašaibén Devléstyr.

²¹Jone ĥazdyné vast pe odolénde, savé sys dro ramánjo lénca; jone phagirdé péskiro dorakiribén;

²²lavá léngire móstyr sys ĥladkedyr ksilestyr, léngire phenybena sys kovledyr maslinitkone dzetestyr (jeliejostyr), ne palál pal lande sys vostra (čolale) kurtaly.

²³Mek péskiro kaló pharipén pe Raste-Devléste, i Jov prirakhela tut. Jov na domekela nijékhvar, sob (kaj) čačipnaskire manušá te obštavenpe.

²⁴[r.s.] Ne Tu, Dévla, janesa telé len dre xasibnýtko ĥanbín (jama); a manušá, savé pročhude rat i savé xohavenas, na prodživena péskire paš dyvesá. Ne me risjováva ke Tu, Dévla, te zrakhavpe.