Read Biblija - Pe Baltitko Romani čib (Romanes) 2019 Baltic Romani Bible Psalmy 58 Bible Online

Psalmy 58 - Biblija - Pe Baltitko Romani čib (Romanes) 2019 Baltic Romani Bible bible

Psalmy 58

¹[57-r.s.] Xoróskire Dirižoróske. “Na xasiakir.” Davidoskiri garady Nadiéia.

²So sykavéla, so tumé rakiréna čačipén? Ci čačunés tumé sendiakirena, čhavé manušýtka?

³Nad, tumé keréna fuipén dro tumaró iló; tumé sýrby važynena pe ubladýtka (viesy) nahrata réndy tumaré vasténca pe phuv.

⁴Fuj manušá džána krig Devléskire droméstyr iščo (inké) dákire ločoviátyr, jone keréna blendy tedy, kiéli jone sys dro dákiro per, xohaí.

⁵Jone isyn pherdé trutasa (jadosa) sýrby sapeskire trutasa, ci sýrby kašuke ĥadoste, so zakerela péskire uštá,

⁶savó na šunéla čovahaneskiri (čaraŭnikoskiri) zan, kon adiáke rangires čovahaniakirela.

⁷Dévla, vyphagir lénge dandá dro muj, pophagir sarésa klyki terné ščerengire, o Rajo Dévla!

⁸Mek jone te rozbiladjon syr paní, so thadéla, mek te phadjon léngire maribnýtka bustiá (striély) lukostyr, kiéli nadtyrdena len.

⁹Mek jone te javén sýrby slimaki (ulitki), so rozbiladjona dre péskiri s'liz', mek jone te javén sýrby sčhurdyno bijáto džuvliáte, savó na udykhéla kham.

¹⁰Angíl dová, syr ke pirja dodžála kodríljo ci te javél jov zeleno, ci šuko te xačol, Devél ukedela len krig riskirdone balvaliasa (vihrosa).

¹¹Čačipnáskiro manúš javéla te radynélpe, kiéli jov čhuvéla kára pe čoré manušénde, i jov vymorela péskire piré (stópy) dro fujé-manušéngiro rat:

¹²[r.s.] i phenéla manúš: “Čačó, isyn lačhó otdyibén pale pal čačipnaskireste. Čačó, Devél isyn Odová, Savó sendiakiréla pe phuv.”