Read Biblija - Pe Baltitko Romani čib (Romanes) 2019 Baltic Romani Bible Psalmy 59 Bible Online

Psalmy 59 - Biblija - Pe Baltitko Romani čib (Romanes) 2019 Baltic Romani Bible bible

Psalmy 59

¹[58-r.s.] Xoróskire Dirižoróske. “Na xasiakir” pe Mielodija, Davidoskiri garady Nadiéia, kiéli Savlo bičhadiá Manušén i jone dykhné ciamkes pal Kher, sob (kaj) te zamarén les.

²Dévla miro! Zrákh man miré vergéndyr, čhuv man pe vučipén odoléndyr, savé ĥazdénape pe mánde.

³Zrákh man manušéndyr, savé keréna čoripén i zrákh man odoléndyr, kon isyn nahrata ke rat.

⁴Pal-dová so ĥáda, jone podrakhena te zamarén man; zor manušá skedénape pe mánde: na pal miré čoré réndy ci pal miro grého, o Rajo Dévla!

⁵Jone prastána i sykliakiréna jekh jekhés, na dykhí, so nane bang mánde. Džanĥadjov te pomogines mánge i podykh.

⁶I Tu, o Rajo Dévla, bolybnáskire-jangoléngiro, Izrailjoskiro Devél, uštý i jav te dykhés saré nácyi, na tangine ni jekhés, kon zrakirelape te kerél čoripén. Séla.

⁷Bel'velienca jone risjona pale, jone vyinena sýrby džukela i obdžana trusciál fóro,

⁸ake, léngire mujendyr čadela, léngire uštendyr džána lavá sýrby vostro (čolalý) kurtála, i jone duminéna péske: “Kon davá šunéla?”

⁹Ne Tu javésa te saspe léndyr, Rajo Dévla, Tu javésa te prosas javír nácyi.

¹⁰Tu san miro Zoralypén, pe Túte me javáva te rikirav nadiéia; Tu, Dévla, san mirí tvárdyma te garadjovav mánge.

¹¹Miro Devél, Savó tanginela man, javéla te dykhelpe mánca, Devél déla mánge te dykháv, syr miré vérgi peréna.

¹²Na zamar len, sob (kaj) miré manušá te na bistren len, rosčhurde len Tyré zorjása i rav telé len, amaró Rajo Dévla, Tu san ščýto amaró.

¹³Léngire móstyr džána grehítka lavá, mek jone te denpe dukhá (te xohavenpe) péskire phut'kiribnastyr pal dová, so jone prokošenas i xohavenas.

¹⁴Hasiakir len dre Péskiri xolý, xasiakir, sob (kaj) jone te na javén, sob (kaj) jone te džinén, so Devél kralinela Jakovostyr až ke jagóry (ke kraí) phuvjákire. Séla.

¹⁵I jone javéna pale bel'velienca, i mek jone te vyinen sýrby džukela i te psirén trusciál fóro;

¹⁶mek jone te psirén odorík i pale pal xabén, mek jone te rykinen, kóli te na javén čale.

¹⁷Ne me javáva te bagáv pal Tyró zoralypén; čačó me javáva te bagáv zoralés pal Tyrí lačhé-ilýtkima zlokostyr (rankostyr): so Tu sánas vaš mánge sýrby zoralý tvárdyma (diz) te garadjovav i nadiéia dre pharé dyvesá.

¹⁸[r.s.] Me javáva te bagáv: “Tu san mirí Zor, Tu san miro Devél, Savó prirakhela man. Miro Dévla, Savó tanginela man.”