Read Biblija - Pe Baltitko Romani čib (Romanes) 2019 Baltic Romani Bible Psalmy 61 Bible Online

Psalmy 61 - Biblija - Pe Baltitko Romani čib (Romanes) 2019 Baltic Romani Bible bible

Psalmy 61

¹[60-r.s.] Xoróskire Dirižoróske. Pe Balytka Strumiénty. Davidóskiro Psálmo.

²Šun, Dévla, so me rovava, i prišunpe ke mirí pátieri (modla).

³Jagoréndyr (krajéndyr), so isyn pe phuv, me kharáva Tut, kiéli miro iló isyn telé: zalydža man pe bérga, so isyn vučedýr mándyr.

⁴Pal-dová so Tu sánas syr garadyipen mánge, sýrby zoralý vučardý (bašnia) miré vergéndyr.

⁵Me javáva te dživáv dre Tyrí šátra pe saré viéki; me javáva te garadjovav i te rikirav nadiéia tel Tyré phaká. Séla.

⁶Pal-dová so, Tu, Dévla, šundián miré sovlahá; Tu dyján mánge meknó mištypén odolengiro, kon strahadjola Tyré lavéstyr.

⁷Tu désa butýr džiibnáskire dyvesá kralíske, sob (kaj) te javén léskire beršá pe butýr viéki,

⁸sob (kaj) jov te bešél pe trono angíl Devléste, mek lačhé-ilýtkima i čačipén te prirakhen les.

⁹[r.s.] Paldavá me javáva te bagáv šaribnytko gilý pal Tyró lav pe saré viéki, sob (kaj) mánge te keráv ke kónco (jagóro) te spolninav miré sovlahá so dyvés.