Read Biblija - Pe Baltitko Romani čib (Romanes) 2019 Baltic Romani Bible Psalmy 63 Bible Online

Psalmy 63 - Biblija - Pe Baltitko Romani čib (Romanes) 2019 Baltic Romani Bible bible

Psalmy 63

¹[62-r.s.] Davidóskiro Psálmo, kiéli Jov sys pe čhučí Phuv ke Judéia

²Dévla! Tu san miro Devél, me samone tasiarlatyr (rankóstyr) rodava Tut. Miro di syr pal paní, savó tyrdelape ke Tu, dre mirí loč (plot') isyn sýrby truš/smega (žažda) pal Túte, syr dre šukí i došaly phuv, so isyn bi panieskiro,

³sob (kaj) te dykháv zor i sláva Tyrí, syr me dykhcjom Tut dro Svénto Štéto.

⁴Tyrí lačhé-ilýtkima isyn mištedyr džiibnastyr, miré uštá javéna te šarén Tut.

⁵Paldavá me javáva te slavinav i te parikiráv Túke dro miro džiibén, me javáva te ĥazdav vastá vaš Tyró lav.

⁶Miro di javéla čaly sýrby čekenesa (tukosa) i thulypnasa i miré uštá javéna te slavinén Tut obradyndle zaniása,

⁷kiéli me priripirava Tut pe miro čhuibén, tedy me duminava pal Túte ratý, kiéli džangadjovava,

⁸so Tu ŭsády (sak) desas vast mánge, a me javáva te radynavpe tel Tyré-phakengiri zor.

⁹Miro di prijacia ke Tu, a Tyró čačó vast podrikiréla man.

¹⁰I odolé, savé rodéna, sob (kaj) te xasiakirél miro džiibén, jone džána dre xoripena tel phuv;

¹¹len otdena tel kurtála, jone javéna sýrby xabén šakalenge.

¹²[r.s.] Ne králi javéla te radynélpe Devléstyr, kažno manúš javéla te šarelpe, kon sovlahala Léskire lavésa, pal-dová so xohaibnaskire muiá javéna zaphandle.