Read Biblija - Pe Baltitko Romani čib (Romanes) 2019 Baltic Romani Bible Psalmy 64 Bible Online

Psalmy 64 - Biblija - Pe Baltitko Romani čib (Romanes) 2019 Baltic Romani Bible bible

Psalmy 64

¹[63-r.s.] Xoróskire Dirižoróske. Davidóskiro Psálmo.

²Šun, Dévla, mirí zan, kiéli me žalinavape, prirakh miro džiibén vergostyr, savó trašakirela man,

³garav man čorahane zrakiribnastyr, savó lydžála ke bída, buntostyr, so keréna čoré manušá,

⁴savé točynena (déna čol) péskire dandá sýrby kurtála; jone čhudé kirke lavá sýrby bustiá pe lúko,

⁵sob (kaj) te den kar'je dre bidošengire manušéste, kiéli jone garadjona. Jekhátyr (srázu) jone déna kar'je dre léste i jone na strahadjona.

⁶Jone podmarena pes pe čoré réndy, jone zrakirenape te čhuvén feliá čorahanés, jone rakiréna: “Kon javéla te dykhél?”

⁷Jone priduminena te kerén čoripén: “Ame skedyjampe te kerás dová, so pridumindiam bidošéngiro.” Godý i iló manušéngire isyn xor garadé.

⁸Ne Devél javéla te del kar'je dre lénde, so léngire fránsy (rany) jekhátyr sykadjona,

⁹sob (kaj) jone te perén jekh pe jekhéste péskire čibatyr, kažno manúš udykhéla, kiéli jone našéna krig.

¹⁰Saré manušá strahadjona i jone javéna te rakirén sarénge pal Devléskiri butý; čačó, jone javéna te ĥaljon Léskiri butý godiása.

¹¹[r.s.] Čačipnaskire javéna te radynénpe Devléstyr i jone javéna te risjon ke Jov te zrakhenpe i saré čačuné ilésa javéna te šarenpe.