Read Biblija - Pe Baltitko Romani čib (Romanes) 2019 Baltic Romani Bible Psalmy 65 Bible Online

Psalmy 65 - Biblija - Pe Baltitko Romani čib (Romanes) 2019 Baltic Romani Bible bible

Psalmy 65

¹[64-r.s.] Xoróskire Dirižoróske. Psálmo i Gilý Davidóskire.

²Tu, Dévla, san mol, sob (kaj) te šarén Tut pe Sióno i Túke manušá déna sovláh.

³Tu šunesa pátieri (molítva), ke Tu javéla kažno džidó manúš,

⁴amaró čoripén isyn zoraledýr améndyr: tu primangesa (prostinesa) aménge amaré čoré réndy.

⁵Bahtaló isyn kodová, konés Tu vykedyjan i čhudián pašyledýr ke Pe: jov javéla te dživél dre tyré gredy (dvory), ame javása čale lačhipnastyr dro Tyró Kher, dre tyrí Khangirí.

⁶Tu otphenesa aménge péskire drieván baré divnone rendénca Péskire čačipnastyr, Dévla, Savó zrakhéla amen, Savéstyr zoralés užakiréna lačhipén saré phuvjákire jagorendyr (krajendyr) i duratuné mor'jendyr (derjavendyr),

⁷Tu čhudián bérgi Péskire zorjása, Tu podphandianpe Péskire zoralypnasa;

⁸Tu štyliakires morjoskiri grukima, valnengiri grukima i manušéngiro búnto.

⁹Jone, savé adiáke-pac' dživéna dre duratuné štéty pe phuv, daréna Tyré ĥiertykendyr (znakendyr). Tu kerésa adiáke, so jagóry (kraí) phuvjákire radynénape tasiarlatyr ke rat.

¹⁰Tu dykhésa pal phuv i paniakiresa la, Tu drieván (zbit) thuliakiresa phuv: Devléskiri reka (len') isyn pherdý paniésa, Tu barvaliakiresa lákiro giv — ake, syr Tu kerésa davá:

¹¹Tu paniakiresa lákire lies'ni (borozny), Tu roŭninesa (kerésa vortes) lákire ĥarbyli, Tu kovliakiresa len sporkone bryšyndenca, Tu bahtiakiresa ŭzbarjakiribena te barjon;

¹²Tu bahtiakiresa aplodo tyré mištypnasa, tyré dromá spialymasa;

¹³požni pe čhučé phuvjá isyn kindle, i tykné bérgicy isyn sýrby podphandle radymása;

¹⁴[r.s.] požni isyn pherdé bakréngire ĥurtenca, doly isyn čhakirde givesa; jone sýrby zoralés radynénape i bagana.