Read Biblija - Pe Baltitko Romani čib (Romanes) 2019 Baltic Romani Bible Psalmy 68 Bible Online

Psalmy 68 - Biblija - Pe Baltitko Romani čib (Romanes) 2019 Baltic Romani Bible bible

Psalmy 68

¹[67-r.s.] Xoróskire Dirižoróske. Davidóskiro Psálmo. Gilý.

²Mek Devél te terdjol i te rosčhurdel Péskire vergén, i mek odolé, savé bidykhena Les, javéna te našén Léskire móstyr.

³Syr thuv rosphurdelape krig, adiáke-pac' Tu rosphurdesa len; syr mom biladjola jagatyr, adiáke-pac' fuj manušá biladjona odój, kaj Devél isyn.

⁴Ne patiaibnaskire manušá javéna bahtalé; jone javéna te radynénpe zoralés, i jone javéna te ĥazdénpe radymása.

⁵Bagán Devléske, bagán šaribnytka giliá Léskire lavéske, ĥazdén šaribnasa Les, Savó tradéla uklisto pir óbloki pe bolybén: Léskiro lav isyn Raj Devél, ĥazdénpe šaribnasa odój, kaj Jov isyn.

⁶Devél, Savó isyn dre Péskiro Svénto Štéto, Dad pirotengiro (sirotengiro), Sendári pivliengiro (udovengiro).

⁷Devél déla kher te dživén odolénge, kon isyn jekhdžine, Jov mekéla pe vólia odolén, kon isyn dre sastyrá: buntuítka manušá jačénape pe šukí phuv.

⁸O, Dévla! Kiéli Tu vydžasas angíl Péskire manušénde, kiéli Tu gíian pir čhučí phuv,

⁹tedy phuv kunindiape i bolybén čhudiá adiáke-pac' paní bryšyndestyr, i bérga Sióno trinskirdiape angíl Devléste, Izrailjoskire Devléste.

¹⁰O, Dévla! Tu bičhadian baró bryšýnd pe Péskiro meknó mištypén te podrikires les, kiéli jov lyjá te došvaljol i Tu dyján zor léske,

¹¹Tyré manušá dživdé odój. Tu, Dévla, kerdián davá vaš čororenge Tyré lačhipnastyr.

¹²Raj Devél déla priphenybén i isyn but džuvliá, kon piridela daja lačhí zan (zvies').

¹³Králja xaladybnengire našéna, jone prastána krig, a džuvliá, savé isyn kheré, roskerena maškír péste mazúri (nagrada), so doresné.

¹⁴Mek tumé te otkhinjon maškír zagony (gražy), kaj isyn bakré, saroiekh tumé javéna sýrby golumbica, savjate phaká (kryly) čhakirde rupésa, a porá čačuné suvnakása.

¹⁵Kiéli Sarezorjákiro Devél rosčhurdyja kral'jén pe bérga Selmono, joj iaciá parny syr iv.

¹⁶Bérga Vasan (Bašan) isyn Devléskiri bérga; pe bérga Vasan isyn but vučipená.

¹⁷Sóske tumé dykhéna zevlynypnasa, bergengire vučipená pe bérga, kaj Devél vykedyjá te dživél? Čačó, Raj Devél dživéla pe láte, pe saré viéki.

¹⁸Devléste isyn biš bará (tysjoncy) maribnýtka vurdená, až len isyn bará maškír bará: Raj Devél isyn maškír lénde, syr Jov isyn pe Péskiro Svénto Štéto pe Sinajo.

¹⁹Jov gijá pe vučipená, Jov lyjá plienonen dre navolia. Jov doresciá dáry manušéndyr, až buntiar'jendyr, pal-dová so Raj Devél javéla te dživél odój.

²⁰Te javél bahtiakirdó Raj Devél, Savó lydžála amaré pharipena so dyvés, Jov isyn Devél, Savó zrakhéla amen.

²¹Amaró Devél isyn Devél, Kon zrakhéla amen. Jov isyn Raj Devél, Devél, Savó zrakhéla amen meribnástyr,

²²Čačó, Devél rospharavela Léskire vergéngire šeré, balengire čekata odolengire, savé dživéna dre gréhi.

²³Raj Devél phendiá: “Me janáva len pale Vašanostyr, Me janáva len morjoskire (derjavéskire) xore šteténdyr,

²⁴sob (kaj) tumarí ĥerój te psirél xor dro léngiro rat, sob (kaj) tumaré-džuklengiri čib te čarel davá rat, kicý lénge trej.

²⁵Jone dykhné, kiéli Tu gíian, o Dévla, syr Tu gíian, Miro Dévla, Miro Khieningo ke Svénto Štéto.

²⁶Bagaibnaskire giné angíl, tén'či bašaibnaskire pe strumiénty vydžánas, maškír lénde sys patyvalé terné džuvliá, savé marenas dre bubny.

²⁷Slavinén i parikirén Devléske odój, kaj manušá skedénape vaš Ráske-Devléske, tumé, kon san Izrailjoskire rodóstyr.

²⁸Pérvo džála ternedyr Vien'iamino, léngiro barydyró, thagárja Judejátyr péskire manušénca, thagárja Zavulonostyr, thagárja Niefalimostyr.

²⁹Dévla, sykáv Tyrí zor: zoraliakir dalé réndy (diély), so Tu kerdián vaš aménge.

³⁰Sob (kaj) králja te janén dáry Túke dre Tyrí Khangirí ke Jerusalimo.

³¹Štyliakir riskiribnáskire murdalén (zvierien) dre triščyna, guruvengire ĥurty, savé isyn manušytkoné cieliantenca, paka jone bandjona šerenca angíl rupeskire koterá. Rosčhurde manušypnaskire nácyi, so drieván radynénape maribnastyr.

³²Vykedyné manušá javéna Jegiptóstyr, Efioptiani vyterdena péskire vastá ke Devél.

³³Bagán Devléske, phuvjákire kralipená, bagán šaribnytka giliá Ráske-Devléske. Séla:

³⁴Savó tradéla uklisto pe bolybén, viéčno bolybén! Gada, Jov déla gódla Péskire zoralé zaniása.

³⁵Priĥaljon šaribnasa Devléskiro zoralypén! Léskiro fedyripen isyn pir Izrailjo i Léskiri zor dre óbloki.

³⁶[r.s.] O, Dévla, Savó isyn zoraló ke dar pe Léskire svénta štéty. Izrailjoskiro Devél! Jov déla zoralypén i zor Léskire manušénge. Mek te slavinelpe Devél!