Read Biblija - Pe Baltitko Romani čib (Romanes) 2019 Baltic Romani Bible Psalmy 69 Bible Online

Psalmy 69 - Biblija - Pe Baltitko Romani čib (Romanes) 2019 Baltic Romani Bible bible

Psalmy 69

¹[68-r.s.] Xoróskire Dirižoróske. Pe Lilijakiri Mielodija. Davidóskiro Psálmo.

²Zrákh man, Dévla, paningá doginé ke mirí men.

³Me tasadyjom dre xor artapiel' (boloto) i, nane kaj te terdjovav pe ĥerá. Me gijom andré xor paniá, so thadena pe mánde, i savé začhuvena man.

⁴Me khinyjom ke men'ka godlymatyr jasvénca, miro kirlo šutija, dre miré jakhá kalyja, syr me užakirava miré Devlés.

⁵Len, savé bidykhena man ni palsó, isyn butydyr miré balendyr pe šeró. Jone, savé keréna xasibén pe mánde, isyn zoralé i isyn xohané vérgi. Syr mánge te otdav pale dová, so me na lyjom pe zor?

⁶Tu, o Dévla, džinésa miro dylnypén, a miré gréhi isyn na garadé Tútyr.

⁷Na domek, Rajo Dévla, Devél bolybnáskire-jangoléngiro, sob (kaj) odolé, savé užakiréna Tut, te javén ladžakirdé pal mánde, na domek, sob (kaj) odolé, savé rodéna Tut, te javén dre ladž pal mánde, o Dévla Izrailjoskiro.

⁸Pal Túte man obrakirenas, ladžaipén čhakirdia miro muj.

⁹Me jacjom čúžo péskire pšalénge, i nákhetanó (postoronnjo) pšal miré-dákire čhavénge.

¹⁰Miro zevlynypén ke Tyró Kher shačkirdiá man syr jag i odolé, savé obrakirenas Tut, pyné obrakiribnasa pe mánde.

¹¹Kiéli me teliakirdjom pes i lyjom te postinav, pal davá jone adiáke-pac' man obrakirde,

¹²me adiáke-pac' uridjom balytko gonó praskasa syr mirí ídia: tén'či jone adiáke-pac' sandle xoliames mándyr.

¹³Odolé, savé isyn bešté pašýl pórta, rakiréna pal mánde, a matymarja bagana giliá pal mánde.

¹⁴Ne me féni pal jekh mangavape Túke, o Rajo Dévla, kiéli isyn lačhó uliago (pora): o Dévla, otphen mánge Tyré lačhé-ilytkimatyr i zrákh man pir Péskiro čačipén;

¹⁵zrákh man dričatyr (tinatyr), sob (kaj) me te na tasadjovav, sob (kaj) mánge te zrakhavpe odoléndyr, savé bidykhena man i xor paningendyr.

¹⁶Mek paningá, so thadena, te na začhuven man cji, sob (kaj) xoripén te na garavel man, i, sob (kaj) ĥanbín bidugnoskiri/kolban' (propast') te na zatyrdel péskiro ziavo (zievo) uprál mánde.

¹⁷Šun man, o Rajo Dévla, pal-dová so Tyrí lačhé-ilýtkima isyn bari. Risjov ke me pir Tyrí bari kovly lačhé-ilýtkima.

¹⁸Na garav Pes Tyré pisharistyr, pal-dová so mánge isyn pharó; vyšún man sýges,

¹⁹iav pašyledýr ke miro di, vyrakh man grehéndyr, mek pe vólia man miré vergéndyr.

²⁰Tu džinésa, so man obrakirena. Tu džinésa pal mirí ladž, i so manušá na déna patýv mánge, i so miré vérgi saré isyn angíl túte.

²¹Vyrakiriben vyhaia miro iló, i me som bizorjákiro, i me užakirdjom, sob (kaj) vari-kon te tanginél (te žalinel) man, ne nikonés na sys, sob (kaj) vari-kon te podrikirél man, ne nijekhes me na lathjom (lastiem).

²²Jone adiáke-pac' dyné mánge želučo dro miro xabén; i kiéli me kamdjom te pjáv, jone dyné šut (uksuso) mánge.

²³Mek léngiro skamínd te kerdjol khudiasa (sietkasa) vaš lénge, mek léngiro mištypén te javél dukhasa te uhtylel len.

²⁴Mek te kaljon léngire jakhá, sob (kaj) jone te na dykhén lénca i mek léngiro trušúl pe dumo ŭsády (sak) te izdral.

²⁵Vyčhuv pe lénde Tyrí xolý, i mek Tyré-xoliakiri jag te doresel len.

²⁶Mek te mekén manušá léngiro kher, mek nijékh te na dživél dre léngire šátry.

²⁷Pal-dová so, konés Tu pekadian, kodolén jone tradéna, i jone rakiréna pal kalypén pe iló odolengiro, konés Tu dukhadian.

²⁸Pričhúv čoripén ke léngiro čoripén, i na domek len te dodžan ke Tyró čačipén.

²⁹Khos krig len Džiibnáskire Lylvarjatyr, čačó, mek jone te na javén začhindlé odój khetané patiaibnytkonenca.

³⁰Ne me som čororó i mánde saró dukhala, o Dévla! Zrákh man i terdiakir man pe ĥerá.

³¹Me javáva te šaráv Devléskiro lav giliasa i me javáva zoralés te šaráv ke vučipén Les i te parikiráv Léske.

³²Davá javéla lačhó Léske butýr, syr te janav guruvén ci guruvorén vaš xačkiribnaskiro svénto dyibén, savénde isyn šyngá (rógi) i ĥerá.

³³Štyl (tiha) manušá dykhéna davá i javéna te radynénpe, i odolé, savé rodéna Devlés, javéna te dživén bahtales.

³⁴Pal-dová so Raj Devél šunéla čororen, i Jov na čhuvéla dre napatyv, savé popyne dro štaribén.

³⁵Mek te šarén Devlés bolybén phuv, i móri (derjavá), i saró, so psiréla dre lénde.

³⁶Devél zrakhéla Sióno i pirikerela Judejákire fórja i Léskire manušá javéna te dživén odój i phuv javéla léngiri.

³⁷[r.s.] I Léskire-pishar'jengire čhavénge piridžala daja phuv i odolé, savénge isyn drógo Jov, javéna te dživén odój.