Read Biblija - Pe Baltitko Romani čib (Romanes) 2019 Baltic Romani Bible Psalmy 7 Bible Online

Psalmy 7 - Biblija - Pe Baltitko Romani čib (Romanes) 2019 Baltic Romani Bible bible

Psalmy 7

¹Davidoskiri-Mangipnytko gilý, saví Jov bagandia Ráske-Devléske pal Xusoskiro Réndo, Kon sys Vien'iaminoskiro Čhavó.

²Miro Tu, Rajo Dévla, Mro Dévla, Dre Savéste me patiáva; zrákh man meribnástyr miré vergéndyr, i prirakh man.

³Sob (kaj) jone te na syr ščer (liévo) rozriskiren miro di, savé lučkirela man pe koterá, kiéli nane nikonés te prirakhel.

⁴Rajo Dévla, Mro Dévla, kóli me kerdjom vari-so dasavo, so isyn načačipén pe miré vastá;

⁵kóli me otdyjom pale fuipnasa odoléske, kon sys dro ramánjo (miro) mánca, ci čordjom odoléstyr, kon mánge isyn pir iló.

⁶Mek vérgi te ĥazdénpe proti miro džiibén, i mek te uhtylén man, mek jone te domaren man dre bláta ke liúno (ado), mek te pasjol Miro baripén dro pylo. Séla.

⁷Uštý, Rajo Dévla, dro Péskiri xolý. Sykáv Pes i pomogin Mánge vergéndyr! Tu sendiakiresa pir čačipén.

⁸Mek saré manušá te skedénpe tel Tyró vast. Lýdža Séndo Tre vučé štetóstyr.

⁹Raj Devél javéla te sendiakirél nácyi. Sendiákir man, Rajo Dévla, pir miro čačipén, pir dová, so nane bang mánde.

¹⁰Sob (kaj) čoripén fujé — manušéngiro te končynelpe, podrikir patyvalé manušés: pal-dová so čačunó Devél propatiakirela iló i godý.

¹¹Devél isyn syr ščýto vaš mánge, Savó zrakhéla čačipnaskire manušén.

¹²Devél isyn čačipnáskiro Sendári, i Devél xoliasóla kažno dyvés pe fujé manušénde.

¹³Kóli vari-kon na risjola pale, to Jov déla čol (vojstrinela) Péskiri kurtála (miečo); Jov bandiakirela Péskiro lúko i Jov isyn skedynó te del kar'je.

¹⁴Jov adiáke-pac' skedéla pe kodoleste meribnaskire strumiénty, Jov keréla Péskire bustiendyr (strielendyr) desté, savé xačona jagása.

¹⁵Ake, jov pharés pričhuvela zor te kerél čoripén, jov lathéla frentyma i janéla načačipén.

¹⁶Jov ĥanadia rovo (xohoi) i vyganadia ĥanbín (jama), i jov pyjá dro daja ĥanbín, saví jov kerdiá.

¹⁷Léskiri frentyma risjola pale pe léskiro šeró, i léskire nahrata réndy peréna pe léskiri fiélia (makuška) (gutup).

¹⁸Ne Me javáva te šaráv Ras-Devlés pal léskiro čačipén, i me javáva te bagáv šaribén, Ráskire-Devléskire lavéske, Naj Vučedyreskireske.