Read Biblija - Pe Baltitko Romani čib (Romanes) 2019 Baltic Romani Bible Psalmy 70 Bible Online

Psalmy 70 - Biblija - Pe Baltitko Romani čib (Romanes) 2019 Baltic Romani Bible bible

Psalmy 70

¹[69-r.s.] Xoróskire Dirižoróske. Davidóskiro Psálmo.

²O, Dévla, zrákh man! O, Rajo Dévla, jav sygedýr te des vast mánge.

³Mek odolé, savé rodéna te zamarén man (te muliakirén), te javén ladžakirdé, mek te našén i te javén dre ladž odolé, savé kaména čoripén mánge.

⁴Mek te risjon pale i te perén dre ladž odolé, kon rakiréla: “Mištó, mek te javél.”

⁵Mek te radynénpe i te javén bahtalé Tútyr odolé, savé rodéna Tut. Mek odolé, savénge drógo san Tu, so Tu zrakhésa len, usady (sak) te rakirén: “Mek te šarén zoralés Devlés.”

⁶[r.s.] Ne me som čororó i mánde isyn trébima: jav sygedýr ke me, o, Dévla! Tu zrakhésa man, i désa vast mánge. O, Rajo Dévla, na mek man gara (dlúges) te užakirav.