Read Biblija - Pe Baltitko Romani čib (Romanes) 2019 Baltic Romani Bible Psalmy 72 Bible Online

Psalmy 72 - Biblija - Pe Baltitko Romani čib (Romanes) 2019 Baltic Romani Bible bible

Psalmy 72

¹[71-r.s.] Solomonóskiro Psálmo. O Dévla! Sykliákir kralís te sendiakirél i kralískire čhavés Péskire čačipnaske.

²Jov javéla te sendiakirél Tyré manušén pir čačipén, a Tyré čororen pir Zakóno.

³Bérgi janéna ramánjo (miro) manušénge, a bérgicy čačipén.

⁴Jov javéla čačunés te sendiakirél čororé manušén i Jov déla zor odolénge, kon isyn dre trébima i Jov rospharavela kodolés, kon pritasavelas len.

⁵Lénde javéla trašaibén angíl Túte, paka kham i čhon isyn pir saré manušýtka ródy.

⁶Králi javéla syr bryšýnd pe félda čarjasa, syr baró paning, so čhuvélape pe phuv.

⁷Dre léskire dyvesá čačipén i ramánjo javéna pe naj šukaredyr štéto ŭsiendie (viezdie), paka čhon isyn pe bolybén.

⁸Léskiro kralipén javéla jekhe morjostyr (derjavestyr) ke javír, Jevfratone rekátyr (leniátyr) ke phuvjákire jagóry (kraí).

⁹Kodolé, savé dživéna pe čhučí phuv, javéna te bandiakiren čangá angíl Léste, i Léskire vérgi javéna te čaren práho.

¹⁰Farsisoskire králja, i savé isyn pir ostrovy (džipá), janéna dan', a Arabijakire i Abisinijakire králja čhuvéna angíl dáry:

¹¹čačó, saré králja peréna pe čangá angíl Léste, saré nácyi javéna te dynarinén Léske.

¹²Pal-dová so jov déla zor odoléske, kon isyn dre trébima i kon davá mangéla, rovi; adiáke-pac' i čororeske, i odoléske, konéske nikón na pomoginela.

¹³Jov prirakhela čorores i bedones, jov déla zor odoléske, kon isyn dre trébima.

¹⁴Jov vyrakhela léngire džiibena, kiéli len pritasavéna i nahratone manušéndyr, a léngiro rat isyn drógo angíl léskire jakhá.

¹⁵I jov javéla te dživél, i léske javéna te den Arabijakiro suvnakái, i pal léste ŭsády (sak) javéna te mangénpe Devléske, Devél javéla te bahtiakirél les pe saré dyvesá.

¹⁶Givá javéna pherdé i but pir sarí phuv, pe vučipén bergengiro; léngiro baritka javéna te trinskirenpe syr veš pe Liváno; manušá dre fórja javéna te luludjon (te cvetinen) syr čar pe phuv.

¹⁷Kralískiro lav javéla ŭsády (sak): léskiro lav javéla džindló paka isyn kham: léskire manušá javéna bahtalé Devléstyr, saré Najudýtka nácyi javéna te šarén les.

¹⁸Te javél bahtiakirdó Raj Devél, Izrailjoskiro Devél, Savó Jekhdžinó keréla dívna butiá.

¹⁹Mek te javél bahtiakirdó Léskiro lav pe saré viéki! Mek te javél pherdý sarí phuv Léskire slavása. Amín' i amín'.

²⁰Davidóskire patierja (molitvy) Devléske, Jesiejoskire čhavéskire, končyndlepe.