Read Biblija - Pe Baltitko Romani čib (Romanes) 2019 Baltic Romani Bible Psalmy 74 Bible Online

Psalmy 74 - Biblija - Pe Baltitko Romani čib (Romanes) 2019 Baltic Romani Bible bible

Psalmy 74

¹[73-r.s.] Asafoskiro Sykliakiribén. Sóske, Dévla, Tu sarésa gíian krig améndyr? Sóske Tyrí xolý syr thuv ĥazdélape pe bakrende Tyré čaritkone feldatyr?

²Rípir Tyró skedyibén, so Tu dorescian ĥaredyr, savó isyn sýrby dólia Tyré mištypnástyr. Rípir bérga Sióno, pe saví Tu dživesa.

³Ĥazde Péskire piré (stópy) pe štéty, so isyn pharade pe viečnyma: vérgo xasiakirdiá saró pe Svénto Štéto.

⁴Tyré namala rykinena maškír Tyré Svénta Štéty: jone čhudé péskire znamiénii (ĥiertyká).

⁵Pe lénde isyn sykado manúš, savó vučés ĥazdéla tovera maškír ĥensto veš;

⁶i kakaná jone phagirena šukár vyčhinyben toveresa i čokanénca (mlotkenca).

⁷Jone zahačkirde Tyró Svénto Štéto; jone magirdé štéto ke phuv, kaj manušá skedénape te den patýv Túke.

⁸Jone phendlé dro péskiro iló: “Javén, xasiakirasa saró khetané”: jone zahačkirde saré štéty pe phuv, kaj manušá skedénape vaš Devléske.

⁹Ame na dykhasa amaré znamiénii (ĥiertyká), nane butýr proróko, i nijékh maškír aménde na džinéla, kicý adiáke javéla?

¹⁰O, Dévla, kicý vérgo javéla te rakirél čoripén? Ci ŭsády (sak) javéla vérgo te kaliakirel Tyró lav?

¹¹Sóske Tu obrikiresa Tyró vast i až Tyró čačó vast? Tyrde javrí les Tyré brekatyr te xasjol jov.

¹²Ne Tu, Dévla, san miro Raj samone anglypnástyr, Savó zrakhéla manušén pe phuv.

¹³Tu roskerdian pe pašá mórjo (derjáv) Tyré zorjása, Tu rospharadian šeré morjoskire (derjavéskire) rupučénge (čudoviščenge) dre paniá.

¹⁴Tu pharadian šeré Lieviafanoske (rupučéske), i Tu dyján len te xan manušénge, savé dživéna pe čhučí phuv.

¹⁵Tu začhudian te thaden folahara (fontany) i baré paningá. Tu šut'kirdian baré réki (leniá).

¹⁶Dyvés isyn Tyró, rat isyn adiáke-pac' Tyrí: Tu čhudián čhon i kham.

¹⁷Tu učhudian saré kustyka (granicy) pe phuv, Tu kerdián lynaj i ivant (zima).

¹⁸Rípir davá: vérgo kaliakirdia Tut, Ras-Devlés, i dylyné manušá čhudé dre bipatyv Tyró lav.

¹⁹Sykáv patýv Tyré Zakonoske, pal-dová so pe ciamle štéty pe phuv isyn pherdó kherá nahratone manušénca.

²⁰Na de riskiribnáskire murdalénge (zvierienge) di, a Tyré manušéngiro, Savó isyn sýrby golumbica! Na bistyr nijékhvar džiibén Tyré pritasade manušéngiro.

²¹Na domek, sob (kaj) pritasade manušá te risjon pale pe ladžaipén. Mek čororé i manušá, savé isyn dre trébima, te šarén Tut.

²²Uštý, o Dévla, terdjov pal Tyró čačipén: rípir, syr dylyné manušá obrakirena Tut so dyvés.

²³Na bistyr zan Tyré-vergengiri: Tyré-namalengiro šumo ĥazdélape kažnoné molostyr, savé isyn buntiarja.