Read Biblija - Pe Baltitko Romani čib (Romanes) 2019 Baltic Romani Bible Psalmy 77 Bible Online

Psalmy 77 - Biblija - Pe Baltitko Romani čib (Romanes) 2019 Baltic Romani Bible bible

Psalmy 77

¹[76-r.s.] Xoróskire Dirižoróske. Pir Idifumoste Jeducinoste (Jedutunoste). Asafoskiro Psálmo.

²Mirí zan isyn ke Devél i me javáva te ĥodlav ke Devél miré zaniása i Jov šunéla man.

³Me rodyjom Ras-Devlés dre pharé miré dyvesá, miro vast sys ĥazdynó ratý i na obmekelape, miro di otphendiape, sob (kaj) te tanginél Les.

⁴Me priripirdjom Devlés, kiéli mánge jaciá pharó, me lyjom te žalinavpe i miro dúho (fáno) pyjá.

⁵Jov rikiréla miré jakhá te javén otkerde, mánge isyn pharó i me na mogináva te rakiráv.

⁶Me dumindjom (dávas gody péske) pal phurané dyvesá, ĥaratuné dyvesá.

⁷Me priripirava mirí gilý ratý, me ripirava miré ilésa i miro dúho (fáno) dobusoves dophučelas:

⁸“Ci Raj Devél jačkiréla amen pe saré viéki? Ci Léskiri láska na risjola pale?

⁹Ci Léskiri lačhé-ilýtkima končyndiape? Ci léskiro phendló lav na javéla butýr ke ame?

¹⁰Ci Devél bistyrdia te tanginél? Ci Jov parudia Péskiro milo lačhé-ilýtkima pe xolý?” Séla.

¹¹I phendjom me: “Kadavá isyn mirí ilytko dukh, so Naj Vučedyreskiro čačó vast parudyja.”

¹²Me javáva te ripirav Ráskire — Devlekire butiá; čačó, me javáva te ripirav Tyré šukár dívy, so Tu ĥará kerdián,

¹³i Me javáva te rozlav ĥodiasa saré Tyré butiá i javáva liéntes te rosphenav pal dová, so Tu kerdián.

¹⁴Dévla! Saró, so Tu kerésa, isyn svénto: kon isyn dasavo baró, syr Tu san, Dévla?

¹⁵Tu san Devél, Savó keréla dívy, Tu sykadian Péskiri zor maškír manušýtka nácyi.

¹⁶Tu vyrakhcian grehéndyr Tyré manušén Péskire zorjása, Jakovóskire i Jozáskire čhavén. Séla.

¹⁷Paniá dykhné Tut, Dévla! Paniá dykhné Tut i jone trinskirdepe. Čačó, xor paniá izdrandyne.

¹⁸Pherdé óbloki pe bolybén dyné telé paniá, bolybén phendiá zaniása, i Tyré maribnýtka bustiá (striély) vurniandyne krig;

¹⁹Tyré-gromoskiri zan (glos) sys baré štormasa, bliskavícy kerdé ziaindlo dud pir saró svéto, phuv izrandyja i trinskirdiape.

²⁰Tyró drom sys pir mórjo (derjáv) i Tu pirigijan baré paniá i Tyré špery (sliady) na džindlé.

²¹Tu lydžijan Tyré manušén syr bakrengiro isyn gurto, Mojzáskire i Aronoskire vasténca.