Read Biblija - Pe Baltitko Romani čib (Romanes) 2019 Baltic Romani Bible Psalmy 80 Bible Online

Psalmy 80 - Biblija - Pe Baltitko Romani čib (Romanes) 2019 Baltic Romani Bible bible

Psalmy 80

¹[79-r.s.] Xoróskire Dirižoróske. Dophenybén pe Lilijakiri Mielodija. Asafoskiro Psálmo.

²Pričhúv kan, Izrailjoskiro Čhupnári! Tu, Savó lydžijan Jozas (Iosifos) syr ĥurto; Tu, Savó san beštó maškír Xieruvimende, sykadjov Pes.

³Sykáv Péskiro zoralypén angíl Jefriemoste, Vienijaminoste i Manasijaste, jav te zrakhes amen.

⁴O, Dévla! Zoraliakir pale amen i mek te ziainel Tyré-moskiro dud i ame zrakhasape.

⁵Rajo Dévla, bolybnáskire-jangoléngiro Devél! Ci but javésa Tu te xoliasos pe mangipén Tyré-manušéngiro?

⁶Tu čaliakirdian len marésa jasvénca i Tu kerdián, sob (kaj) jone te p'jen jasva baré mierasa?

⁷Tu kerdián, sob (kaj) amaré susiédy (kotárja) te marénpe pal aménde i amaré vérgi te sanpe améndyr maškír péste.

⁸O, Dévla, bolybnáskire-jangoléngiro! Zoraliakir pale amen i mek te ziainel Tyré-moskiro dud, i ame zrakhasape.

⁹Tu jandian vinagradoskiro xrústo (loza) Jegiptóstyr, Tu tradyjan krig javír nácyi i čhudián davá xrústo dre phuv:

¹⁰Tu žužakirdian štéto angíl davá, léskire kórni (rukhá) giné xor i jov rozbarija pir sarí phuv.

¹¹Bergicy sys učhakirde léskire zorjása i léskire randiá sys syr baré kiedry.

¹²Jov rozmekcia péskire randiá (vétki) ke mórjo (derjáv), a péskire senki (suki) ke reka (len').

¹³Sóske Tu phagirdian tyny (ogrady), so sys trusciál daja bar, sob (kaj) kažno, kon prodžála mamúi, te obkošel lákire múri?

¹⁴Vešytko baličo podĥanavela kórni (rukhá) i feldytko murdál (zvierjo) obhala les.

¹⁵O, Dévla, bolybnáskire-jangoléngiro, ame drieván mangasa Tut te risjos pale. Dykh telé bolybnástyr pe aménde i, ake, jav te dykhés Péskire-vinagradoskiri bar;

¹⁶iav i rozdykh dalé vinagradoskire kaštore, savé Tyró čačó vast počhudia i léskiro terné randiá (otbaripen), so Tu kerdián zoraledýr

¹⁷Jone shačine jagása, vyčingirde; mek te xasjon jone Tyré-moskiri xoliátyr.

¹⁸Mek Tyró čačó vast te javél upredyr vastéstyr Tyré manušeskirestyr, konéske Tu dyján zor vaš Péske.

¹⁹Tedy ame na dasape pale Tútyr, džidiakir amen nevéstyr (nevés) i ame prikharasa Tyró lav.

²⁰[r.s.] Zorjakir amen nevéstyr, o Rajo Dévla, Devél bolybnáskire-jangoléngiro; ker, sob (kaj) te ziainel Tyró muj i ame zrakhasape.