Read Biblija - Pe Baltitko Romani čib (Romanes) 2019 Baltic Romani Bible Psalmy 83 Bible Online

Psalmy 83 - Biblija - Pe Baltitko Romani čib (Romanes) 2019 Baltic Romani Bible bible

Psalmy 83

¹[82-r.s.] Gilý. Asafoskiro Psálmo.

²O, Dévla! Na beš štyl, i na jav muto (niemo), na jav štyl, o Dévla:

³pal-dová so, ake, Tyré vérgi godlena, i odolé, savé bidykhena Tut, ĥazdéna péskire šeré,

⁴Jone zrakirenape frentes pe Tyré manušénde, jone zaduminena fuipén proti odolénde, savén Tu prirakhesa;

⁵jone rakiréna: “Javén te kerás, sob (kaj) te vyčhurdas len syr nacyja, sob (kaj) butýr Izrailjoskiro lav te na ripirelpe.”

⁶Pal-dová so jone zrakirdepe dre jekh godý, jone khetaniakirdepe proti Túte.

⁷Šátry Jedomoskire i Ismail'tianengire, Moávo i Agaro,

⁸Ĥievalo i Amono i Amaliko, Filistimliáni i Tiroskire džiibnáskire,

⁹Asirija adiáke-pac' gijá lénca; jone dyné vast Lotoskire čhavénge. Séla.

¹⁰Ker adiáke-pac' Midianenge syr Sisaraske, syr Iadinoske pašýl sýgno paning Kisono,

¹¹savé xasiné pašýl Jendoro, savé jačné syr phuvjákiro gnejo (gnojo).

¹²Ker léngire thagar'jenca (kniaz'jenca) syr Orievosa (Ariebosa), Zivosa i saré léngire kralískire semencenca, syr Zebosa i Salmanosa,

¹³pal-dová so jone phendlé: “Javén, lása péske Devléskire čaritka phuvjá.”

¹⁴O, mro Dévla! Ker léndyr vihroskiro pylo, piriker len dre čhučó phus angíl balvál.

¹⁵Syr jag xačkiréla veš, syr bari jag podhačkirela bérgi,

¹⁶adiáke-pac' trade len baré štormosa i trašakir len Tyré-xoliamé balvaliasa.

¹⁷Rajo Dévla! Učhakir léngire muiá ladžakiribnasa, sob (kaj) jone te rodén patýv Tyré lavéske.

¹⁸Te javén jone ladžakirdé i trašakirde pe saré viéki, te našaven jone patýv i te xasjon:

¹⁹[r.s.] sob (kaj) jone te džinén, so Tu san Jekhdžinó, Konéskiro lav isyn Raj Devél, Sámo Baredýr pe sarí phuv.