Read Biblija - Pe Baltitko Romani čib (Romanes) 2019 Baltic Romani Bible Psalmy 86 Bible Online

Psalmy 86 - Biblija - Pe Baltitko Romani čib (Romanes) 2019 Baltic Romani Bible bible

Psalmy 86

¹[85-r.s.] Davidoskiri Pátieri (Molítva). O, Rajo Dévla, pričhúv telé Tyró kan, otphen mánge, pal-dová so me som čororó i dre trébima.

²Rakh miro di, pal-dová so me som devlýtko. Tu san, miro Dévla, Savó zrakhéla Péskire pisharís, kon risjola ke Tu te zrakhelpe.

³Jav tangipnaskiro ke me, o Rajo Dévla, pal-dová so, me so dyvés prikharava Tut saré zorjátyr.

⁴Obradyn Tyré-pishariskiro di, pal-dová so me ĥazdáva péskiro di ke Tu, Rajo Dévla.

⁵Pal-dová so Tu, Rajo Dévla, san lačhó i Tu kamésa te primanges: Tu san barvaló lačhé-ilytkimasa sarénge, kon prikharela Tut.

⁶Pričhúv kan, o Rajo Dévla, syr me mangavape Túke, prišunpe ke mangipén, syr manušá prikharena Tut.

⁷Me javáva te prikharav Tut dro dyvés, syr isyn pharó mánge, pal-dová so Tu otphenesa mánge.

⁸Nane nijékh dasavo maškír devlorende, syr Tu san, Rajo Dévla, nijékh na keréla dasavé butiá, syr Tu.

⁹Saré nácyi, savé Tu sozdyjan, javéna i déna patýv Túke. O, Rajo Dévla, jone déna sláva Tyré lavéske.

¹⁰Pal-dová so Tu san baró ke vučipén i kerésa baré dívna butiá: Tu san féni (tóka) Jekh Devél.

¹¹Sykliákir man te psirav Tyré dromésa, Rajo Dévla. Me javáva te dživáv pir Tyró patiaibén: ker adiáke, sob (kaj) dro miro iló te javél trašaibén angíl Devléste.

¹²Me javáva te šaráv Tut saré miré iléstyr, o Rajo Dévla, miro Devél, i me javáva te slavinav Tyró lav pe saré viéki.

¹³Pal-dová so Tyrí lačhé-ilýtkima isyn bari ke vučipén i Tu vytyrdyjan miro di samone telatuné liunostyr (adostyr).

¹⁴O, Dévla! Phut'kirdé manušá ĥazdynépe pe mánde i nahratone-manušéngiro skopo rodelas te zamarén man, i jone na rikiréna Tut dre godý angíl péste.

¹⁵Ne Tu, o Rajo Dévla, san lačhé-iléskiro Devél, tangipnaskire i vyrikiribnytko, Tu san barvaló pe lačhé-ilýtkima i patiaibén.

¹⁶Risjov ke me i jav tangipnaskiro ke me, piride Tyró zoralypén Tyré pisharíske i rakh Tyré-pisharicakire čhavés.

¹⁷Sykáv Tyré-lačhipnaskiri ĥiertýk (znamiénijo), sob (kaj) odolé, savé na kaména man zoralés, moginénas te dykhén i jone javénas ladžakirdé, pal-dová so Tu, Rajo Dévla, dyján vast mánge i podrikirdian man.