Read Biblija - Pe Baltitko Romani čib (Romanes) 2019 Baltic Romani Bible Psalmy 88 Bible Online

Psalmy 88 - Biblija - Pe Baltitko Romani čib (Romanes) 2019 Baltic Romani Bible bible

Psalmy 88

¹[87-r.s.] Gilý i Psálmo Kariejoskire Čhavéngiro. Xoróskire Dirižoróske. Mielodija Tugasa. Emanakire-Ezrahitoskiro Sykliakiribén.

²O, Rajo Dévla, Devlale, Savó zrakhéla man. Me rovava godlása dyvés i rat angíl Túte.

³Mek te dodžal mirí pátieri (molítva) ke Tu, pričhúv telé kan, syr me rovava.

⁴Pal-dová so miro di isyn pherdó pharipnenca i miro džiibén dodžála ke maĥila.

⁵Man ginéna akaná khetané odolenca, savé džána ke ĥanbín (jama); me som manúš, savéste nane zor:

⁶Savó isyn meknó maškír mulende, sýrby odolé, so isyn zamardé i pašté dre ĥanbín, konés Tu butýr na ripiresa, i savé isyn čhurdyné te xasjon Tyré vastésa.

⁷Tu čhudián man dre sámo telatuny ĥanbín dre kalé (ciamle) štéty, dro sámo xoripén.

⁸Tyró xoliakiribén čhudo pe mánde i Tu tasavesas man saré Tyré valnenca. Séla.

⁹Tu durjakirdian miré malen (drugen), Tu kerdián, sob (kaj) jone te jačen džungalé mánca: me som zaphandlo, me na mogináva te džav javrí.

¹⁰Mirí jakh kerdjola fujedýr rovibnastyr. O, Rajo Dévla! Me so dyvés kharavas Tut jasvénca, me tyrdava Péskire vastá ke Tu.

¹¹Ci javésa Tu te kerés dívy mulenge? Ci uštena mulé i parikirena Túke. Séla.

¹²Ci javéla phendló sarénge dre ĥanbín pal Tyrí lačhé-ilýtkima? Ci pal Tyró patiaibén dro štéto, kaj xasjona?

¹³Ci javéla džindló pal Tyré dívy dro kalypén (ciamlypén), ci pal Tyró čačipén pe phuv, kaj bistresa?

¹⁴Ne me dáva gódla ke Tu, Rajo Dévla i pe zlóko (ránko) miro mangipén angíl Túte.

¹⁵O, Rajo Dévla, sóske Tu jačkirdian miro di? Sóske Tu garavesa Péskiro muj mándyr?

¹⁶Miré čhavoripnastyr man tasavena i me nábut so na meráva. Me menčynavpe darátyr ke meribén, Me sarésa pyjom dro dúho (fáno).

¹⁷Tyrí jaguny bari xolyn gijá pir mánde; Tu darakirdian man ke xasibén:

¹⁸Jone oblenas trusciál man syr baró paní; jone tasavenas man khetané saré rigéndyr.

¹⁹[r.s.] Tu durjakirdian mándyr males (drugos) i manušvare manušés, miré džindlé manušés. Kalypén (ciamlypén) isyn pe léngiro štéto.