Read Biblija - Pe Baltitko Romani čib (Romanes) 2019 Baltic Romani Bible Psalmy 89 Bible Online

Psalmy 89 - Biblija - Pe Baltitko Romani čib (Romanes) 2019 Baltic Romani Bible bible

Psalmy 89

¹[88-r.s.] Sykliakiribnaskiri Gilý Jefanostyr Ezrahitostyr.

²Me ŭsády (sak) javáva te bagáv pal Ráskire-Devléskiri lačhé-ilýtkima miré mósa, ne me javáva te rosphenav sarénge pal Tyró patiaibén rodóstyr ke ródo.

³Pal-dová so me phendjom: “Lačhé-ilýtkima javéla te jačélpe pe saré viéki.” Tu zorjakirdian Péskiro patiaibén až ke sámo bolybén.

⁴Me sčhudjom zavieto Miré vykedyné manušénca. Me sovlahadjom Davidóske, miré pisharíske.

⁵Me dáva zor Tyré rodóske pe saré viéki, i ĥazdáva Tyró trono pe saré ródy. Séla.

⁶I bolybnáskire Jangóly javéna te šarén Tut pal Tyré dívy, Rajo Dévla, adiáke-pac' pal Tyró patiaibén pe sventonengiro skedyibén.

⁷Kon pe bolybén isyn ravno Ráske-Devléske? Konés maškír bolybnáskire Jangolende saštý te priparuven Rása-Devlésa.

⁸Devél isyn baró ke dar pe sventonengiro skedyibén, Jov isyn zoralypnaskiro, sob (kaj) saré, kon isyn pašýl Léste, te den bari patýv Léske.

⁹O, Rajo Dévla, Devél bolybnáskire-jangoléngiro! Konéste isyn dasavo zoralypén syr Túte, Rajo Dévla? Tu san patiaibnýtko dro saró.

¹⁰Tu rikiresa zor pe mórjo (derjáv), syr jov xoliames ĥluminela: kiéli léskire valny ĥazdénape vučés, Tu štyliakiresa len.

¹¹Tu pharadian Jegípto pe koterá, syr kodolés, kon isyn muliakirdo; Tu rosčhurdyjan Tyre vergén Tyre zoralypnaskire vastésa.

¹²Tyró isyn bolybén i Tyrí isyn phuv, svéto i saró, sósa jov isyn pherdó. Tu začhudian len.

¹³Tu sozdyjan paš-ratítko i paš-dyvesýtko rig, Favoro i Jermono radynénape Tyré lavéstyr.

¹⁴Tyró psikó isyn zoralypnaskiro; zoraló isyn Tyró vast, vučó isyn Tyró čačó vast.

¹⁵Čačipén i čačunó séndo rikiréna Tyró trono, lačhé-ilýtkima i patiaibén džána angíl Túte.

¹⁶Bahtalé isyn manušá, savé džinéna rádyma Tyré zaniátyr (glosiátyr): jone dživéna pir dud (svéto), savó džála Tútyr.

¹⁷Jone célo dyvés radynénape Tyré lavéstyr; i jone ĥazdénape radymása Tyré čačipnastyr.

¹⁸Pal-dová so Tu désa sláva léngire zorjake, i Tu ĥazdesa amen vučés Tyré laskasa.

¹⁹Pal-dová so Raj Devél isyn amaró ščýto, i amaró Králi isyn Sventoné Izrailjostyr.

²⁰Vari-syr Tu rakirdian dro sunó Péskire Sventoneske i Tu phendián: “Me dyjom vast jekhe murškaneske, Me ĥazdyjom les pe trono, savés Me vykedyjom manušéndyr.

²¹Me lathjom Miré pisharís Davidós, me pomakhcjom les Miré sventoné olivitkone dzetesa (jeliejosa):

²²Me čhuváva Péskiri burnyk (ladožka) te podrikirav les, i Miro vast javéla te zorjakirel les.

²³Vérgo na déla dukhá les i čoro manúš na pritasavela les.

²⁴I me pharavava léskire vergén angíl léskiro muj, i Me ravava odolén, savé bidykhena les.

²⁵I Miro patiaibén i drógo lačhipén javéna lésa i léskiro ródo javéla ĥazdynó šaribnasa Miré lavésa.

²⁶Me čhuváva léskiro vast pe mórjo (derjáv) i léskiro čačó vast pe réki (leniá).

²⁷Jov javéla te del gódla Mánge! Tu san miro Dad, miro Devél i Skála te zrakhavpe.”

²⁸Me keráva les Miré pervonesa (anglatunesa), savó javéla sámo vučó phuvjákire kral'jendyr.

²⁹Me javáva te rakhav Mirí lačhé-ilýtkima pe saré viéki, i Miro zavieto jačélape tvardes lésa.

³⁰I me ŭsády (sak) javáva te zorjakirav léskire čhavén i léskiro trono javéla adákicy dyvesá, kicý isyn bolybén.

³¹Kóli léskire čhavé mekéna Man, i na javéna te dživén pir Miré priphenybená;

³²pal-dová so jone javéna te phagiren Miré statúty (ustavy) i na javéna te rakhén Miré priphenybená:

³³tedy Me čhuváva kára destesa pe lénde pal léngire čoré réndy, i Me pekavava len pal léngire gréhi.

³⁴Ne me na lavá krig Mirí lačhé-ilýtkima Davidostyr i Me na domekava, sob (kaj) miro patiaibén te xasjol;

³⁵Me na phagirava Miro zavieto, Me na paruvava dová, so vygijá Miré móstyr.

³⁶Jekhvar me sovlahadjom Miré Sventymasa, so me nijékhvar na xohavava Davidós:

³⁷léskiro ródo ŭsády (sak) jačélape i léskiro trono javéla ĥará (dlúges), syr kham, so svencynela angíl Mánde.

³⁸Jov javéla ŭsády (sak) syr čhon i syr patiaibnýtko jakhítko pe bolybén. Séla.

³⁹Ne Tu, Rajo Dévla, jačkirdian i na prilyjan Les, Tu sánas drieván xoliamó pe Tyré pomakhne pishariste,

⁴⁰Tu risijan krig Zavietostyr, so Tu dyján Tyré dynaríske, Tu čhurdyjan viánka (koróna) pe phuv.

⁴¹Tu phagirdian saré léskire foróskire ogrady, Tu pirikerdian saré foróskire rikiribena dre rade bará.

⁴²Saré, kon džála mamúi, občorena les, a saré pašatuné obrakirena les.

⁴³Tu dyján zor manušéskire čačé vasteske; savó pritasavelas les, Tu kerdián, sob (kaj) saré léskire vérgi te radynénpe:

⁴⁴ĥáda, Tu tempiakirdian léskire-kurtalakiri vóstrima (čolypén), i Tu na ĥazdyjan les dro maribén.

⁴⁵Tu kerdián, so léskiri sláva pirijaciá te ziainel i Tu čhurdyjan pe phuv léskiro trono;

⁴⁶Tu kerdián tyknedýr léskire tyrne beršá, Tu učhakirdian les ladžasa. Séla.

⁴⁷O, Rajo Dévla! Kicý javésa Tu te garadjos? Ci javéla Tyrí bari xolyn te xačol syr jag?

⁴⁸Rípir, me mangav Tut: savó miro džiibén isyn. Vaš savó xarnypén (sujéta) Tu sozdyjan manušytkoné čhavén?

⁴⁹Savó manúš saštý te dživél i te na dykhél meribén? Ci zrakhéla jov péskiro di liunoskire zorjátyr? Séla.

⁵⁰O, Rajo Dévla, kaj isyn Tyró drógo lačhipén, savó ĥaredyr sys Túte, so Tu sovlahadian Davidóske Tyré patiaibnása?

⁵¹Rípir, o, Rajo Dévla, syr obrakirena Tyré dynarís! So me pirilydžijom pal brek, syr but manušá obrakirena,

⁵²sósa Tyré vérgi prokošena Tut, o Rajo Dévla, sósa jone prokošena pienty (khurjá) Tyré pomakhneske?

⁵³[r.s.] Te šarén usady (sak) Ras-Devlés. Amín' i amín'.