Read Biblija - Pe Baltitko Romani čib (Romanes) 2019 Baltic Romani Bible Psalmy 9 Bible Online

Psalmy 9 - Biblija - Pe Baltitko Romani čib (Romanes) 2019 Baltic Romani Bible bible

Psalmy 9

¹[1] Xoróskire Dirižoróske. Pe Mielodija pe Gilý. Pal Labienoskiro Meribén. Davidóskiro Psálmo.

²Me parikirava Ráske-Devléske saré miré iléstyr, Me piriphenava pal saré Tyré dívna butiá,

³Me javáva lošalo (viesjolo) i javáva te radynavpe dre Túte, Me javáva te šaráv Tyró lav, O Sámo Vučedýr.

⁴Kiéli vérgi denape pale, tedy jone peréna i xasjona angíl Tyró muj.

⁵Tu sendiakirdian pir miro réndo i lathian miro čačipén: Tu san beštó pe trono i sendiakiresa čačunés.

⁶Tu štyliakirdian Najudýtka nácyi, Tu xasiakirdian beden (biden), Tu khoscian krig léngire lavá pe saré viéki.

⁷A vérgi xasiné sarésa, Tu xasiakirdian adiáke-pac' fórja, so až bistyrde pal lénde.

⁸Ne Raj Devél isyn beštó pe saré viéki, Jov čhudiá Péskiro trono te sendiakirél.

⁹I Jov javéla te sendiakirél svéto čačipnása, Jov javéla te sendiakirél manušén, syr trej te javél.

¹⁰Jov javéla te zrakhél dro Péskiro baró kher odolén, konés tasavena, kaj javéna te ĥaradjon dre pharé dyvesá.

¹¹A odolé, savé džinéna Tyró lav, javéna te patián dre Túte, so Tu, Rajo Dévla, na mekcian ni jekhés, kon rodéla Tut.

¹²Bagán i šarén Ras-Devlés, Savó kralinela pe Sióno! Phenén saré nacyienge, so Jov kerdiá.

¹³So Jov čhuvéla kára pal manušýtko rat, Jov ripirela odolén, kon stradynela.

¹⁴Tangine (požalin) man, Rajo Dévla; dykh rakhunes saré iléstyr pe miro stradico (bída) vergéndyr, zrákh man meribnástyr, so saštý te javél rigátyr,

¹⁵Sob (kaj) me te terdjovav angíl manušénde Sionóstyr, i te rosphenav pal so trej te šarén Tut. Me javáva te radynavpe, so Tu zrakhcián man.

¹⁶Najudýtka nácyi peréna dre ĥanbín, so jone vyĥanade, léngire ĥerá peréna dre felý, so jone garadé.

¹⁷Raj Devél sykadiá Pes, Kon Jov isyn, kiéli Jov lydžijá sendytka réndy čačipnása; fuj manušá xasjona daléstyr, so jone kerdé péskire vasténca. Štyl (tiho) mielodija. Séla.

¹⁸Fuj manušá džána pir drom te xasjon, i saré Najudýtka nácyi, savé bistrena pal Devléste.

¹⁹Devél na bistrela kodolén, savé isyn bizorjákire, i na xasiakiréla čororengiri nadiéia, savé ŭsády (sak) užakiréna Les.

²⁰Terdjov angíl, Rajo Dévla, sob (kaj) manušá te na len upralypén, mek Najudýtka nácyi te na našén Tyré sendostyr.

²¹Čhuv sendaris pe lénde, Rajo Dévla, mek kadalé Najudýtka manušá te džinén, so jone isyn féni manušá i, savé adiáke-pac' meréna. Séla.