Read Biblija - Pe Baltitko Romani čib (Romanes) 2019 Baltic Romani Bible Psalmy 90 Bible Online

Psalmy 90 - Biblija - Pe Baltitko Romani čib (Romanes) 2019 Baltic Romani Bible bible

Psalmy 90

¹[89-r.s.] Mojzaskiri Pátieri (Molítva), Savó sys Devléskiro Manúš.

²O, Rajo Dévla! Tu sánas usady (sak) aménge syr amaró kher vaš saré ródy!

³Angíl, syr Tu sozdyjan bérgi, ci syr Tu začhudian phuv i svéto i až viekostyr ke viéko Tu san Devél.

⁴Tu kerésa, so manúš pirikerelape dro práho i rakirésa: “Risjon, manušéngire čhavé.”

⁵Pal-dová so bar (tysjonco) berš vaš Túke isyn syr atasiatuno dyvés, so progijá (nakhcia), i syr stréga (straža) ratiakiri.

⁶Tu lydžása krig amaré beršá syr tasadypnaskiro paning (navodnienijo); jone isyn syr lindra (driemota): tasiarlatyr jone isyn syr čar, so barjola: i zlokostyr (rankostyr) joj luludjola (cvetinela) i jačélape zeleno, a bel'velié joj murdaljola (vianinela) i vyšutjola.

⁷Pal-dová so ame xasjovasa Tyré xoliátyr, i aménge isyn pharó, syr Tu zoralés xoliasosa.

⁸Tu čhudián amaré čoré réndy angíl Péste, amaré garadé gréhi te dykhén len.

⁹Pal-dová so saré amaré dyvesá džána krig Tyré xoliakiribnastyr: amaró džiibén prastala ke kónco (ke jagóro) syr jekh phurdypen ĥondiasa (ŭzdohosa).

¹⁰Amaré-džiibnáskire dyvesá džána ke eftadešá (bitrijandengiro šel) berš, a kóli ame sam zoralé, to ke ohtodešá (bibišengiro šel) berš. Ne naj fedýr pora amaré džiibnastyr isyn doiá, syr ame sam nasvale ci khine butiátyr-davá prodžála (nakhela) sýges i ame vurniasa krig.

¹¹Kon džinéla Tyré-xoliakiri zor? Kon uĥaljola dar, so javéla Tyré xoliakiribnastyr?

¹²Sykliákir amen te ginas amaré dyvesá, sob (kaj) te javél godypén dro amaró iló?

¹³Risjov, o Rajo Dévla: kicý saštý te xoliasos? Jav lačhé-iléskiro ke Tyré pishárja.

¹⁴Čaliakir amen tasiarlatyr Péskire lačhé-ilytkimasa i ame javása viesiéla (lošalé) i javása te radynaspe saré amaré dyvesá.

¹⁵Obradyn amen pe adákicy dyvesá, kicý Tu pritasavesas amen, pe adákicy beršá, kicý ame piridživdiam čoripén.

¹⁶Mek te dykhén Tyré butiá Tyré pishárja, mek te dykhén Tyrí rajkany sláva amaré čhavé.

¹⁷I mek šukaripén amaré-Ráskire-Devléskiro, amaré Devléskiro te javél pe aménde: de zor amaré-vastengire butienge, zorjakir amaré vastá, so keréna butiá.