Read Biblija - Pe Baltitko Romani čib (Romanes) 2019 Baltic Romani Bible Psalmy 94 Bible Online

Psalmy 94 - Biblija - Pe Baltitko Romani čib (Romanes) 2019 Baltic Romani Bible bible

Psalmy 94

¹[93-r.s.] O, Rajo Dévla, Savó čhuvéla kára, Devlale, Savó čhuvéla kára (xas'), sykadjov Kokoró.

²Gazde Pes, Tu, Sendári, pir sarí phuv, sendiakir čačunés phut'kirden.

³O, Rajo Dévla, kicý javéna fuj manušá, kicý javéna fuj manušá te radynénpe?

⁴Jone vyphenenape, jone rakiréna barikanes, saré, kon keréla čoripén, phutjona pésa.

⁵Jone rospharavena Tyré manušén pe koterá (kuski), o Rajo Dévla, jone pritasavéna Tyró mištypén;

⁶jone zamarena pivlien (udoven) i čužoné manušén i muliakirena piroten (siroten).

⁷I jone rakiréna: “Raj Devél na dykhela davá, ci Izrailjoskiro Devél na riskiréla godý pe davá.

⁸Ĥaljon tumé, xrustengire (bigodiakire), maškír manušénde; tumé san dylyné, kiéli tumé javéna godé?

⁹Ci na došunela Odová, Kon čhudiá kan? Ci na dodykhela Odová, kon kerdiá jakh?

¹⁰Ci na javéla te sendiakirial Odová, Kon sykliakiréla nácyi? Kodová, Savó déla godý manušénge?

¹¹Raj Devél džinéla manušéngire dúmy, so jone isyn xartytka (sujetna).

¹²Bahtaló isyn manúš, savéske Tu désa godý, o Rajo Dévla, savés Tu sykliakiresa Tyré Zakonoske,

¹³sob (kaj) Tu te des léske te otkhinjol pharé dyveséndyr, paka ĥanbín (jama) javéla te ĥanavelpe vaš fujé manušénge.

¹⁴Pal-dová so Raj Devél na jačkiréla Péskire manušén, i Jov na mekéla odolén, savé isyn sýrby léskiro meknó mištypén;

¹⁵ne Léskiro séndo javéla nevéstyr čačunó, a odolé, konéste isyn čačunó iló, javéna te džán pal davá duredýr.

¹⁶Kon javéla te zaterdjol pal mánde angíl odolénde, savé keréna čoripén? Kon javéla te rikirél mirí rig proti odolénde, savé keréna beda réndy (zlydnitka diély)?

¹⁷Kóli na délas vast mánge Raj Devél, tedy miro di ĥará javélas odój, kaj isyn meribnytko štylypen.

¹⁸Syr me phenáva: “Mirí ĥerój kuninelape, tedy Tyrí lačhé-ilýtkima, o Rajo Dévla, podrikiréla man,

¹⁹Kiéli miré dúmy pherdiakirena miro šeró, butýr i butýr, tedy Tu podrikiresa i obradynesa miro dúho (fáno).

²⁰Tu na javésa khetané čoré ranca, savé priduminena fuipén zamiést odová, so isyn dro Zakóno.

²¹Jone skedénape khetané te muliakirén čačipnaskire manušés, jone bangiakirena bibange manušés, sob (kaj) te pročhuven léskiro rat.

²²Ne Raj Devél javéla te zaterdjol pal mánde te broninel man; i miro Devél isyn syr bérga mánge te ĥaradjovav.

²³Jov riskiréla pe lénde léngiro čoripén, i Jov xasiakiréla len léngire fuipnasa, Raj Devél, amaró Devél, čhurdéla len te xasjon.