Read Biblija - Pe Baltitko Romani čib (Romanes) 2019 Baltic Romani Bible Psalmy 99 Bible Online

Psalmy 99 - Biblija - Pe Baltitko Romani čib (Romanes) 2019 Baltic Romani Bible bible

Psalmy 99

¹[98-r.s.] Raj Devél kralinela: mek te izdran manušýtka nácyi. Jov isyn beštó pe Péskiro trono maškír Xieruvimende: mek te kuninelpe phuv.

²Raj Devél isyn baró pe Sióno i Jov isyn vučedýr saré manušytkoné nacyiéndyr.

³Mek te slavinén jone léskiro lav, so Jov isyn drieván slavútno ke dar — Jov isyn Svénto!

⁴Tu san zoralypnaskiro Králi, Savéske trej čačunó séndo. Tu začhudian čačipén: davá isyn Tu, Savó keréla pir čačipén i patiaibén dre Jakovoste.

⁵Barjakirén ke vučipén Ras-Devlés, amaré Devlés i den patýv Léske angíl Léskire ĥerá. Jov isyn Svénto.

⁶Mójza i Arono sys maškír Léskire rašande i Samuílo sys maškír odolénde, savé prirakhenas léskiro lav: jone kharenas Ras-Devlés, i Jov otphenélas lénge.

⁷Jov rakirdiá lénge dro stýlbo oblokendyr: jone rikirenaspe ke Léskiro dophenybén i ke statúto, so Jov dyjá lénge.

⁸O, Rajo Dévla, amaró Devél, Tu otphendian lénge: Tu sánas vaš lénge Devél, Savó primangela lénge, ne Savó čhuvéla kára pal fuipén, so jone kerdé.

⁹Slavinén zoralés Ras-Devlés, amaré Devlés i den patýv Léske pašýl Léskiri Svénto bérgica, pal-dová so Raj Devél isyn amaró Svénto Devél.