Read Biblija - Pe Baltitko Romani čib (Romanes) 2019 Baltic Romani Bible Pritčy 1 Bible Online

Pritčy 1 - Biblija - Pe Baltitko Romani čib (Romanes) 2019 Baltic Romani Bible bible

Pritčy 1

¹Solomonóskire pritčy, Davidóskire čhavéskire, Izrailjoskire-kralískire tuménge,

²sob (kaj) tumé te džinén godypén, i te sykljon čačipnaske, sob (kaj) tumé te ĥaljon xor lavá rakiribnastyr;

³sob (kaj) tumé te doresen (te ĥaljon) godypén, čačipén, čačipnytko otlydžaiben i čačunó séndo.

⁴Te den godý prostone-ileskirenge džinybén i rozlyiben terné manušéske.

⁵Kon isyn godó (god'varó) manúš, javéla te šunél i te sykljol butýr; manúš baré godiása doreséla péske lačhó godypén (sovieto),

⁶sob (kaj) te ĥaljol pritča i čorahano vyphenyben, godé-manušéngire lavá i léngire šerepharibnytka (zagadki).

⁷Angíl saréstyr trej te dares Devléstyr, sob (kaj) te javél davá džinybén, ne bigodiakire manušá na priléna ke godý godypén i uphenybén.

⁸Šun, míro čhavó, so tyró dad uphenela i na prilé bi patyvakiro (na steliakir) dová, pal so daj sykliakiréla;

⁹pal-dová so jone javéna sýrby bahtalypnaskiri viánka pe tyró šeró i sýrby miriklia trusciál tyrí men.

¹⁰Míro čhavó; kóli grehítka manušá tyrdena tut ke pe, na zdžape (na malynpe) lénca.

¹¹Kóli jone phenéna: “Jav aménca, javén, podrakhasa te zamaras ke rat, javén, užakirasa bibangeskire manušés, konéste nane doš;

¹²iavén, nakhavasa len džidenca syr liúno (ado), i sarén kodolén, savé džána pročhuven telé dre maĥila (kula).

¹³Ame lathasa (zalasa) saró kuč barvalypén, ame pherdiakirasa amaré kherá čorde mištypnasa;

¹⁴tu čhurde péskiro žrebijo pe baht khetané aménca i aménde sarénde javéla jekh traminengiro (košel'ko).”

¹⁵Míro čhavó! Na psir jekhe dromésa lénca. Rakh krig péskiri ĥerój léngire dromorestyr;

¹⁶pal-dová so léngire ĥerá prastána te kerén čoripén, i jone prastána sýges te pročhuven manušéngiro rat.

¹⁷Ne ivjá (naprásnes) jone čhudé felý angíl jakhá saré čirikliende.

¹⁸I kadalé manušá isyn pašté, i sýrby užakiréna pe léngiro rat, jone ĥaradjona čorahanés i rodéna meribén péske.

¹⁹Kadasavó isyn taláno manušénge, savé isyn ĥalka (alčna) ke manušéngiro barvalypén, ke xohanó kófo (pribyl'), jone sýges phagirena péskiro šeró.

²⁰Godypén godlela javrí pe vulíca (gása): jov ĥazdéla péskiri zan (glos) pe foruniá (plóščy);

²¹godypén prikharela pe trušulytka dromá, pašýl foróskiri pórta i dro fóro rakiréla:

²²“Ci but tumé, búra manušá (nievieždy), javéna te tyrdenne ke napatyvalypen (biladžaipén)? Ci but odolé, kon salape xoliames, javéna te bahtaljon xoliamé sabnastyr? Ci but (kicý) dylyné javéna drieván te na prilén džinybén?

²³Risjon mósa ke me, kiéli me bangiakirava xoliames tumen: ake, me vyphurdava miro dúho (fáno) pe tuménde, me keráva adiáke, sob (kaj) tumé te džinén miré lavá.

²⁴Paldavá so me khardjom, i tumé na kandyné (otphendlepe); me protyrdyjom péskiro vast i nijékh na prilyjá ke iló.

²⁵Pal-dová so tumé na prilyné saré godypena (soviety) i na riskirdé ile, kiéli me sykadjom tumarí bang,

²⁶me javáva te savpe tumaré baré bidatyr (xasibnastyr), me javáva te prosav tumen, syr javéla trašaibén (bari dar).

²⁷Kiéli trašaibén peréla pe tuménde syr sýgno xasiakiriben i tumaró xasibén javéla syr vihro, kiéli bari dar i bída peréna pe tuménde,

²⁸to tedy tumé kharéna man, ne me na javáva te otphenav tuménge, i tumé javéna te rodén man saré zorjátyr, ne tumé na lathéna man.

²⁹Pal-dová so tumé na vyrikirenas džinybén, i na vykedyné vaš péske (na zakamle te kutiakires ke dar) Ras-Devlés,

³⁰i tumé nijékhvar na prilyné miro godypén i tumé na prilyné ke godý, syr me sykadjom tumarí bang,

³¹pal-dová tumé javéna te xan dová, so tumé san mol, i tumé javéna te čaljon doléstyr, so tumé pridumindle.

³²Pal-dová so jone xasjona, kiéli jone risjona krig godypnastyr i dylyné-manušéngiri nahratyma kokori xasiakiréla len.

³³Ne kon šunéla miré lavá, kodová javéla te dživél bi darákiro, i jov javéla bi trašaibnaskiro (štylés), jov na javéla te darel fuipnastyr.”