Read Biblija - Pe Baltitko Romani čib (Romanes) 2019 Baltic Romani Bible Pritčy 11 Bible Online

Pritčy 11 - Biblija - Pe Baltitko Romani čib (Romanes) 2019 Baltic Romani Bible bible

Pritčy 11

¹Načačune ubladýtka (viesy) isyn džungalé Ráske-Devléske, ne čačunó pharipén vaš vieso zoralés radynela Les.

²Kiéli javéla phut'kiribén, javéla i ladž, ne naphut'kirde manušénde isyn godypén.

³Devlytkoné-manušéngiro lačhipén javéla te prirakhel len, ne napatiaibnaskire-manušéngiro čoripén xasiakiréla len.

⁴Barvalypén na déla ni savó lačhipén dro xasibnýtko dyvés, ne čačipén zrakhéla meribnástyr.

⁵Čačipén sykavéla drom bidošakire manušéske, ne fuj manušá peréna péskire fuipnastyr.

⁶Čačipén zrakhéla devlytkoné manušén, ne napatiaibnaskire peréna dre felý péskire frentymatyr, pal saví jone tradenape.

⁷Syr fuj manúš meréla, léskiro lačhó užakiribén (léskiri nadiéia) xasjola, i načačune-manušéngiro lačhó užakiribén bidatyr xasjola.

⁸Čačipnáskiro isyn zrakhno bidatyr, a fuj manúš peréla odorík pe štego léskiro.

⁹Duje-mujengiro manúš péskire lavénca xasiakiréla péskire pašatunes, ne čačunó zrakhélape péskire džinybnasa.

¹⁰Syr saró džála lačhés čačipnaskirenca, fóro drieván radynélape; i syr fuj manušá xasjona, fóro déla gódla radymátyr.

¹¹Devlytka bahtiakirena (blagoslovinena) i ĥazdéna ke vučypen fóro, ne fuj-manušéngire muiá ravena telé les.

¹²Nabaré-godiákiro dykhéla vučipnástyr pe péskire pašatuné manušéste, ne manúš, savó ĥaljola, kodová rikiréla ramánjo/ miro [isyn štyl-r.s.].

¹³Phukaibnaskiro (pierienosčyko) rosphenéla čorahanyben, ne kodová, savéste isyn patiaibnýtko dúho (fáno), garavela réndo.

¹⁴Kaj na déna godypén manušénge, manušá peréna, ne kaj isyn but manušá te den godý, tedy odój nane dar.

¹⁵Odová, kon isyn dudvalo (jakhítko) pal čužoné manušéste, keréla fuj péske, ne kodová, kon drieván na kaméla te javél dudvalesa (poručytieljosa), isyn bidarakiro.

¹⁶Lačhé-ilytko džuvlý doreséla patýv, ne pharé-butiakire manušá doreséna barvalypén.

¹⁷Lačhé-iléskiro manúš keréla lačhipén péskire dieske, a biileskiro [holiamó-r.s.] manúš keréla doš péskire ločake (plotiake).

¹⁸Fuj manúš keréla došvaly butý, ne odová, kon rosčhuvela čačipén, doreséla mištó mazúri (nagrada).

¹⁹Čačipén lydžála ke džiibén, ne odová, kon rodéla čoripén, rodéla les vaš péskiro meribén.

²⁰Raj Devél rikirlape krig odoléndyr, savé keréna čoripén pefromi (narošnes), ne bidošengire dre saré dromá zoralés radynena Les.

²¹Mek jone i khetaniakirenpe vasténca, ne fuj manušá na jačénape nabange; ne čačuné-manušéngiro ródo (mištypén) javéla rakhno.

²²Suvnakuný angrusty dro balyčengiro nakh (piatako) isyn dová-pac', syr isyn šukár džuvlý, saví but na ĥaljola.

²³Čačuné manušá drieván tyrdenape ke lačhipén, ne lačhó užakiribén (nadiéia) fujé-manušéngiri lydžála ke bari xolyn.

²⁴Jekh manúš déla drieván but, ne i léske pribarjakirelape butýr, ne javír drieván pririkirela péske, i jov jačéla čororedyr.

²⁵Kon rozdela but, odová javéla barvaló, kon paniakirela javirén, odová adiáke-pac' javéla paniakirdo.

²⁶Manušá prokošena odolés, kon pririkirela giv, ne bahtaló javéla odoleskiro šeró, kon biknela les.

²⁷Manušés, savó dobusoves (staratiel'nes) rodéla lačhipén, odová rodéla láska Devléstyr, ne pharó javéla kodoléske, savó rodéla čoripén.

²⁸Kon zoralés patiála dro péskiro barvalypén, odová peréla, ne čačuné manušá javéna naj šukár syr patria (listy) pe kašt (drévo).

²⁹Kon keréla doš (čoripén) péskire kheréske, odová doreséla balvál syr meknó mištypén, ne dylynin'ko manúš javéla pishári godé-iléskire manušéske.

³⁰Čačipén isyn džiibnáskiro kašt (drévo) sýrby phabaj i godó manúš prityrdela dijá.

³¹Kóli čačunó manúš doreséla mazúri (nagrada) pe phuv, tedy butýr doreséla grehítko i fuj manúš.