Read Biblija - Pe Baltitko Romani čib (Romanes) 2019 Baltic Romani Bible Pritčy 12 Bible Online

Pritčy 12 - Biblija - Pe Baltitko Romani čib (Romanes) 2019 Baltic Romani Bible bible

Pritčy 12

¹Kon kaméla, sob (kaj) les te sykliakirén, odoleska trej džinybén, a kon drieván na kaméla, syr sykavéna léskiri bang, odová isyn nagodo.

²Ráske-Devléske isyn drógo lačhó manúš, ne Jov bangiakirela manušés, savó priduminela fuipén.

³Manúš nane terdó zoralés fuipnastyr, ne rukh (kornjo) čačuné-manušéngiro na kharélape (na piričhuvelape) krig.

⁴Kuč romný isyn sýrby koróna pe romeskiro šeró, ne kodoia, saví ladžakirela les, isyn sýrby kirnypen dre léskire kokalý.

⁵Čačuné manušá duminéna pal čačipén, ne fuj manušá khetané déna xohanó godypén.

⁶Fuj manušá rakiréna lavá: “Podrakhasa te zamaras”, ne devlytkonengire lavá vyrakhena len.

⁷Fuje manušén ravena telé i jone nane butýr, ne kher čačuné-manušéngiro javéla te terdjol.

⁸Manušés šarena pal léskiri godý, ne manušá javéna te dykhén vučipnástyr pe odoléste, konéste isyn xohanó iló.

⁹Nabaró manúš, savéste isyn dynári, fedýr kodolestyr, savó isyn dre patýv féni péste, ne léste na uhtýlla (nádosi) maró.

¹⁰Čačunó manúš pekelape (zabotisola) pal léskire kheritkoné murdalénde, ne fujé-manušéngiro iló isyn bimanušytko (bitangipnaskiro).

¹¹Kon keréla butý pe péskiri phuv, odová javéla te xal maró čalés, ne kodová, savó džála pal balvalitkone manušénde, nábut ĥaljola.

¹²Fuj manúš isyn ĥálko te uhtylel čoripnasa, ne čačuné manušénde isyn zoralý phuv tel ĥerá.

¹³Fuj manúš peréla dre felý čoripnasa péskire uštendyr, ne čačunó manúš džála krig pharipnastyr.

¹⁴Manúš javéla čalo lačhipnastyr syr phabatyr, so vydžála léskire uštendyr, i javéla dynó manušéske pir butiá léskire-vastengire.

¹⁵Dylyneskiro drom isyn čačunó dre léskire jakhá, ne odová, savó kandéla, syr léske déna godypén, isyn godó.

¹⁶Dylynin'ko manúš jekhátyr zoralés xoliasóla, ne baré-godiákiro sčhakirela xolý.

¹⁷Kon rakiréla dová, so jov džinéla, odová phenéla čačipén, ne načačuno dudvalo /iakhítko (svidietieljo) xohavela.

¹⁸Kon rakiréla, i na duminéla, odová promarela javirés syr kurtála (sablia), ne godé-manušéngiri čib sastiakirela les.

¹⁹Patiaibnytka lavá javéna te rikirenpe ŭsády (sak), ne xohany čib pe momiento.

²⁰Frentyma isyn dro iló odolénde, savé keréna čoripén, ne kon déla godypén pal ramánjo (miro), kodová radynélape.

²¹Čačuné manušés obdžala rigasa meribnytko dar, ne fuj manušá javéna pherdé čoripnasa.

²²Raj Devél rikirlape dre rig xohané uštendyr, ne odoléndyr, savé keréna pir patiaibén, Jov bahtaljola.

²³Baré-godiákiro manúš garavela džinybén, ne dylynó rosphenéla angíl sarénde dylnypén.

²⁴Dobusovo vast javéla te xulainél, ne nabutitko vast začhuvena ke butý zorjása.

²⁵Kalypén pe iló pritasavela manušés, ne lačhó lav radynela les.

²⁶Čačuneske trej te vykedel malen (drugen), pal-dová so fuj manušá lydžána krig droméstyr.

²⁷Nabutitko manúš na pekela mas, so jov doresciá pe stariben (ohota), ne dobusovo manúš barjakiréla mištypén.

²⁸Čačunó drom lydžála ke džiibén, pe léskire dromore nane meribén.