Read Biblija - Pe Baltitko Romani čib (Romanes) 2019 Baltic Romani Bible Pritčy 13 Bible Online

Pritčy 13 - Biblija - Pe Baltitko Romani čib (Romanes) 2019 Baltic Romani Bible bible

Pritčy 13

¹Godó čhavó šunéla, syr dad sykliakiréla les čačipnaske, ne kon isyn napatyvakiro ke javír, jov na šunéla, syr sykavéna bang léske.

²Manúš čaliakirela lačhipnása sýrby phabatyr péskire uštendyr, ne napatiaibnaskire dijá čaliakirenape nahratymatyr.

³Kon pririkirela péskiro muj, odová rakhéla péskiro džiibén, ne kodová, savó otphandela buĥles péskiro muj, odová xasjola.

⁴Kirne-maséngiro manúš tyrdelape te xal, ne nisó na doreséla, ne dobusovengiro (staratiel'no) di javéla barvaló.

⁵Čačunó manúš drieván na kaméla xohaibén, ne nadevlytko manúš lydžála pes namištes i doreséla ladž.

⁶Čačipén rakhéla odolén, savengiro drom isyn bidošéngiro, ne fuipén ravela telé [hasiakiréla-r.s.] grehitkoné manušés.

⁷Isyn manúš, savó sykavéla pes, xaj, jov isyn barvaló, ne nisó nane léste. Isyn manúš, savó sykavéla pes sýrby jov isyn čororó, ne léste isyn baró barvalypén.

⁸Manúš moginéla te del péskiro barvalypén pal džiibén syr symadý (zalogo), ne čororó na šunéla, syr sykavéna bang léske.

⁹Čačuné-manušéskiro dud (svéto) xačola radymása, a fujé-manušéskiro momolýtko (svietíl'niko) murdjola.

¹⁰Phut'kiribnastyr džála čingárd, ne, kon kandéla, syr léske déna godypén, odová isyn godó.

¹¹Mištypén, so manúš doreséla bipatyvakire rendéndyr, tyknjola, ne kon kerdiá butý pharés, odoleskiro mištypén barjola.

¹²Užakiribén, so na janéla nisó, keréla adiáke, so iló dukhala, ne kiéli zoraló mangipén kerélape dro čačipén, tedy džiibén pherdjola radymása.

¹³Kon na priléla ke godý lav, isyn xasibnýtko, ne kon kutiakirela ke dar priphenybén, odová doreséla mazúri (nagrada).

¹⁴Godé-manušéskiro lav isyn džiibnáskiri ĥanýng, sob (kaj) te risjon krig meribnaskire feliatyr.

¹⁵Kon ĥaljola mištés, kodová isyn manušénge pir iló, ne napatiaibnytko manúš pharés dživéla.

¹⁶Baré-godiákiro manúš keréla saró džinybnasa, ne dylynó sykavéla mamúj péskiro dylnypén.

¹⁷Fuj manúš, savó bičhadó zaniása (viestiasa), peréla dro pharipén, ne patiaibnýtko viestia-bičhaibnaskiro (poslo) janéla sastypen.

¹⁸Čororipen i ladž peréna pe manušéste, savó vyčhurdela iléstyr dová, pal so sykliakiréna les. Ne kodová, savó priléla les, kiéli les bangiakirena zoralés, javéla dre patýv.

¹⁹Kiéli zoralý myslia ke vari-so kerélape ke kónco (ke jagóro), davá gudliakirela iló, ne dylyneske na pir iló te džal krig fuipnastyr.

²⁰Kon kumplinelape (malynelape) godé manušénca, javéla godó, ne kampanija (malypen) dylynin'konenca xasiakiréla les.

²¹Fuipén rodéla grehitkoné manušén, ne čačuné manušénge otpleskirelape pale lačhipnása.

²²Lačhó manúš jačkiréla meknó mištypén (nasliedstvo) léskire-čhavéngire čhavénge, ne barvalypén grehitkoné-manušéngiro prirakhelape vaš čačuné manušénge.

²³But maró isyn pe čhučé féldy čororé manušéngire, ne, kaj na uhtýlla (nádosi) čačipén maškír manušénde, odój javéla xasibén.

²⁴Kon žalinela péskiri ran, odoléske nane drógo drieván čhavó, ne konéske isyn drógo jov, odová sykliakiréla ke dukhá tyknal les.

²⁵Čačunó manúš xála čalés, kicý léskiro di kaméla, ne fujé-manušéngiro kužum (želudko) javéla te bokhaljol.