Read Biblija - Pe Baltitko Romani čib (Romanes) 2019 Baltic Romani Bible Pritčy 14 Bible Online

Pritčy 14 - Biblija - Pe Baltitko Romani čib (Romanes) 2019 Baltic Romani Bible bible

Pritčy 14

¹Godý džuvlý rikiréla kher, ne nabaré-godiakiri džuvlý phagiréla les péskire dylnypnasa.

²Kon keréla saró pir čačipén, kodová kutiakirela ke dar Ras-Devlés, ne kon keréla čoripén pefromi, odová na priléla ke godý Les.

³Dylynó rikiréla phut'kirdes ke ran pe péskiro dumo, ne godé uštá rakhena manušén.

⁴Kaj nane guruvén, odój jasla (khurly) isyn čhučí, ne baró pribytko (umaloto) javéla guruveskire zorjátyr.

⁵Patiaibnýtko jakhítko na javéla te xohavél, ne načačuno jakhítko javéla te phenél xohaibén.

⁶Bipatyvakiro manúš rodéla godypén, i na lathéla nisó, ne džinybén lokhes délape kodoléske, savó isyn godypnaskiro (god'varó).

⁷Durjov (naš krig) dylyné manušéstyr, saveskire uštendyr tu na šunesa džinybén (god'varé lavá).

⁸Baré-godiákiro manúš džinéla, so jov keréla akaná i duredýr, ne dylynó garavela péskiro dylnypén dro léskiri frentyma, sob (kaj) te xohavél.

⁹Dylynin'ka prosana péskire gréhi, ne maškír devlytkonende isyn jekh godý.

¹⁰Jekh iló džinéla péskiro kirkipen, ne čúžo na phenéla javireske pal péskiri rádyma.

¹¹Fuje-manušéngiro kher ravena telé, ne devlytkonengiri šátra javéla naj šukaredyr.

¹²Isyn drom, savó zdelape manušéske, so jov isyn mamúj (priámo), ne pe kónco (pe jagóro) jov lydžála ke meribén.

¹³Mek manúš i salape, ne pe iló léste saštý te javél dukh; i bari rádyma javír mólo piridžala dro kalypén.

¹⁴Bede-iléskiro manúš čaljola péskire fujé butiendyr, ne lačhó manúš javéla čalo peskirendyr.

¹⁵Prostone-godiakire manušá patiána kažnoné lavéske, ne baré-godiákiro manúš obduminela lačhés kažno šago (lamny).

¹⁶Godó manúš daréla i durjola čoripnástyr, ne dylynó sýges xoliasóla i zoralés patiála dre péste.

¹⁷Hačkirdo manúš keréla nagod'vares, ne manušés, savó priduminela fuipén, zoralés na kaména.

¹⁸Prostone-godiakire manušá doreséna dylnypén syr meknó mištypén, ne baré-godiakirenge manušénge džinybén délape sýrby koróna.

¹⁹Čoré manušá bandiakirena šeró angíl lačhende, i fuj manušá angíl čačuné-manušéngiri pórta (vráty).

²⁰Čororé manušés zoralés na kaména až léskire pašatuné manušá, ne barvaleste isyn but drúgi (malá).

²¹Kon dykhéla vučipnástyr pe péskire pašatuneste, kodová keréla grého; ne bahtaló isyn kodová manúš, kon isyn lačhé-iléskiro (žalinela) ke kodolé, savén pritasavéna.

²²Ci na xohavenape odolé, savé priduminena čoripén? Ne kodolé, savé priduminena lačhipén, dykhéna javire manušéndyr drógo lačhipén i patiaibén.

²³Kažnoné pharé butiátyr manušéske javéla kófo (pribyl'), ne čhučé (pustone) rakiribnastyr manúš javéla čororó.

²⁴Godé manušá doreséna barvalypén syr koróna, ne dylynin'ko féni péskiro dylnypén.

²⁵Čačunó jakhítko vyrakhela manušéngiro džiibén, ne frento jakhítko rakiréla xohaibén.

²⁶Kon daréla Rástyr-Devléstyr, kodová manúš isyn zoralés terdó, i léskire čhavénge javéla štéto te garadjon.

²⁷Kon daréla Rástyr-Devléstyr, kodová p'jela džiibnáskire ĥanyngatyr, sob (kaj) te riskires krig meribnaskire feliatyr.

²⁸Kralískiro baripén rikirlape pe dová, syr but isyn léste manušá, ne kiéli kralíste isyn nábut manušá, tedy jov našavela saró.

²⁹Manúš, savó liéntes (na sýges) xoliasóla, isyn baró godiari, ne kodová, savéste isyn xačkirdo dúho (fáno), sykavéla pe jakhá péskiro dylnypén.

³⁰Lačhó iló déla džiibén masenge, ne zevlynypén kirniakirela kokalý.

³¹Kon pritasavela čorores, kodová sýrby obrakirela Ras-Devlés, Savó sozdyjá les. Ne kodová keréla patýv Léske, Savó isyn lačhé-dieskiro ke manušá, kon isyn dre trébima.

³²Fuj manušá peréna péskire fuipnastyr, ne čačunó isyn zoralés terdó až dro sámo léskiro meribén.

³³Godypén otkhinjola štylés dre baré-godiákiro iló, ne dová, so isyn dre dylynin'konengiro iló, džindló sarénge.

³⁴Čačipén ĥazdéla manušén (narodo), ne grého léla krig patýv kažnoné manušéndyr.

³⁵Králi sykavéla patýv godé dynaríske, ne jov zoralés xoliasóla pe odoléste, savó ladžakirela les.