Read Biblija - Pe Baltitko Romani čib (Romanes) 2019 Baltic Romani Bible Pritčy 15 Bible Online

Pritčy 15 - Biblija - Pe Baltitko Romani čib (Romanes) 2019 Baltic Romani Bible bible

Pritčy 15

¹Kovlo otphenybén štyliakirela xolý, ne pharó lav vykharela baredýr xolý.

²Čib godé-manušéngiri isyn pherdý džinybnasa, ne čib dylyneskiri vyčhuvela duredýr dylnypén.

³Ráskire-Devléskire jakhá isyn pe kažno štéto i dykhéna ciamkes pal fujé i lačhé manušénde.

⁴Lačhí čib isyn sýrby džiibnáskiri ĥanýng, ne mižeh čib phagiréla dúho (fáno).

⁵Dylynó dykhéla vučipnástyr, kiéli les dad sykliakiréla, ne kon priléla bang, kiéli léske sykavéna, isyn baré-godiákiro.

⁶Dre čačuné-manušéskiro kher isyn but kučipena, ne fujé-manušéngire kofostyr jekh tugipen (piridživipen).

⁷Godé-manušéngire uštá déna džinybén, ne dylynin'kone-manušéngiro iló na keréla adiáke.

⁸Raj Devél rikirlape dre rig svénto dyibén, so fuj manušá janéna, ne jov zoralés radynélape mangipnastyr, savó keréna devlýtka manušá.

⁹Raj Devél na priléla fujé-manušéngiro drom, ne Léske isyn dróga kodolé, savé rodéna i džána duredýr pir čačipén.

¹⁰Drieván pharés sykliakiréna odolés, kon jačkiréla lačhó drom, i kodová, savó bidykhela (savéske na pir iló), kiéli les sykliakiréna, meréla.

¹¹Kóli isyn džindló Ráske-Devléske, so kerélape dro liúno (ado) i Abadono, to tedy pe kicý butedýr Jov džinéla manušéngire ile.

¹²Kon sykavéla bipatyv [rozmekne manušéske na pir iló-r.s.], kiéli léske vyrakirena zoralés, kodoléske isyn na drógo kadavá manúš; adiáke-pac' jov na džála ke godé manušá te den godý léske.

¹³Radymakiro (lošalo) iló keréla bahtaló muj, ne kalypén pe iló phagiréla dúho (fáno).

¹⁴Godypnaskiro iló rodéla džinybén, ne dylyneskire uštá čaravenape dylnypnasa.

¹⁵Saré pritasade-manušéskire dyvesá isyn bibahtalé, ne manušéste radymakire ilésa ŭsády (sak) isyn svénko.

¹⁶Te javes čororó i te dares Devléstyr isyn fedýr, syr te javes baré barvalypnasa, ne pharipnasa pe iló.

¹⁷Fedýr te xas šaha dro čaró, ne kaj túke sykavéna patýv, syr te xas thule tieliantos, ne kaj tut bidykhena.

¹⁸Xolynakiro manúš vykharela košybén, ne kon rikiréla pes xoliátyr, odová kovliakirela čingárd.

¹⁹Kirne-maséngiro drom isyn syr tyno phusadytkone (tiernytkone) xrustendyr, ne devlytkonengiro drom isyn mamúj (priámo).

²⁰Godó čhavó radynela péskire dadés, ne dylynin'ko manúš dykhéla vučipnástyr pe péskire date.

²¹Nabaré-godiákiro manúš radynélape léskire dylnypnastyr, ne god'varó manúš psiréla mamúj (priames).

²²So manúš priduminela bi godé-lavengiro, savé déna but manušá, odová délape dukhá, ne kaj but manušá déna godý, odój saró isyn zoraló (mištó).

²³Manúš radynélape péskire lačhé otphenybnastyr, lačhó lav rakirlape, kiéli jov trej.

²⁴Godé-manušéskiro drom dro džiibén džála upré, sob (kaj) jov te risjol krig liunostyr (adostyr), so isyn telé.

²⁵Raj Devél xasiakiréla kher, kaj phut'kirdé isyn, ne Jov déla zor pe kustyka, kaj pivlia (udovy).

²⁶Raj Devél isyn džungaló doléstyr, so bibahtalé manušá priduminena, ne bidošengire-manušéngire lavá isyn lačhé Léske.

²⁷Kon isyn ĥálko (žadno) ke kófo, kodová keréla pharipén péskire kheréske, ne kon bidykhela (konéske na pir iló) myty (vziatki), javéla te dživél.

²⁸Čačuné-manušéngiro iló obduminela (sykljola), syr te otphenel, ne fujé-manušéngiro muj pyrskinela bibahtiasa.

²⁹Raj Devél durjola fujé manušéndyr, ne Jov šunéla čačuné-manušéngiri pátieri (molítva).

³⁰Jakhengiro dud radynela iló, i lačhí zan (zvies') thuliakirela kokalý.

³¹Kon šunéla, kiéli léske sykavéna bang dro džiibén (les sykliakiréna džiibnaske), jačélape maškír godé manušénde.

³²Kon vyčhurdela iléstyr dová, sósa les sykliakiréna, odová na priléla ke godý péskiro dúho (fáno), ne odová, kon šunéla sykliakiribén, isyn god'varó.

³³Kon daréla Rástyr-Devléstyr, odová sykljola godypnaske, i angíl, syr te doresel patýv, trej te javél naphut'kirdesa.