Read Biblija - Pe Baltitko Romani čib (Romanes) 2019 Baltic Romani Bible Pritčy 16 Bible Online

Pritčy 16 - Biblija - Pe Baltitko Romani čib (Romanes) 2019 Baltic Romani Bible bible

Pritčy 16

¹Manúš priduminela péskire ilésa, ne dová so jov Rástyr-Devléstyr pe davá otphenelape čibása (čibjasa).

²Dre manušéskire jakhá saré léskire dromá isyn bidošengire, ne Raj Devél roskedela (važynela) tumaró dúho (fáno).

³Dopatia Tyrí butý Ráske-Devléske, i tyré dúmy risjona dro čačipén.

⁴Raj Devél kerdiá saró vaš Péskiro zaduminyben; i, až fujé manušés vaš xasibnýtko dyvés.

⁵Kažno (sváko) phut'kirdo ilésa manúš isyn džungaló (brydinela) Ráske-Devléske, mek jone isyn dro jekh vast jekh jekhésa, me sovlahava: nijékh na našela bibangipnaskiro.

⁶Lačhé-ilytkimasa i čačipnása otmekelape bang pal čoripén, kon daréla Devléstyr, kodová otdžala (durjola) bibahtiatyr (čororipnastyr).

⁷Kóli manušéskire dromá isyn lačhé Ráske-Devléske, Jov keréla adiáke, so až léskire vérgi isyn dro ramánjo lésa.

⁸Fedýr te javél nábut, ne doresno čačipnása, syr te javél baró kófo, ne načačipnasa.

⁹Manušéskiro iló obduminela péskiro drom, ne Raj Devél sykavéla (mamuiakirela) léskiro drom.

¹⁰Kralískire uštá isyn devliakirde, léskire moske naštý te obdžal čačipén (te xohavél) pe séndo.

¹¹Čačuné ubladýtka (viesy) i ubladýtka čašy isyn Rástyr-Devléstyr; saré tyrdyne (giri) dro gonó isyn Léskiro keriben.

¹²Kral'jenge isyn stetka (drieván džungalé) kodolé, kon keréla čoripén, pal-dová so trono rikirlape čačipnása.

¹³Čačuné uštá zoralés radynena kralís, i léske isyn drógo odová, kon rakiréla čačipén.

¹⁴Kralískiro xoliakiribén sykavéla pe meribén, ne godó manúš kovliakirela kralís.

¹⁵Syr kralískiro muj ziainela, to džiibén déla sarénge, i léskiri láska isyn syr óbloko vesnakire bryšyndesa.

¹⁶Pe but fedýr isyn suvnakástyr te jačes godedyr, i te jačes baré-godiakiresa isyn fedýr rupéstyr.

¹⁷Čačunó drom vaš devlytkonenge isyn dre dová, sob (kaj) te durjon čoripnástyr. Kon rikirlape ke péskiro [rakhéla-r.s.] drom, odová rakhéla péskiro dúho (fáno).

¹⁸Phut'kiribén isyn usady (sak) ke xasibén, manúš, savó zadelape, syg peréla.

¹⁹Fedýr isyn te javes naphut'kirde duhósa maškír kandune / prostone manušénde, syr te roskeren čordo doresybén maškír phut'kirdé manušénca.

²⁰Kon priléla lav godiása, odová lathéla lačhipén, i kon risjola ke Raj Devél te zrakhelpe, odová isyn bahtaló.

²¹Konéste isyn godó iló, kodová kharélape baré-godiákiro, gudlé uštá barjakirena sykliakiribén.

²²Konéste isyn godypén, davá isyn džiibnáskiri ĥanýng (istočniko); ne te sykliakires dukhanes pal doša dylynen-davá isyn dylnypén.

²³Godé-manušéskiro iló sykliakiréla les, so te rakirél, i déla butýr džiibén léskire uštenge.

²⁴Kuč lavá isyn syr avgín (meda): gudló vaš di, i sastypen vaš kokalý.

²⁵Isyn drom, syr zdelape manušéske, sob (kaj) jov isyn čačunó, ne jov ladžala ke meribén.

²⁶Manúš, savó keréla butý pharés, keréla butý pharés vaš péske, pal-dová so bokhalo muj začhuvela les.

²⁷Bidevlytkari [frentari-r.s.] ĥanavela bibáht, i léskire uštá isyn sýrby jag, saví xačkiréla.

²⁸Načačuno manúš rozlydžala čingárd, kon gundiarinela (šepčynela), odová roskerela fedyršone malen.

²⁹Nahrato manúš prityrdela ke pe léskire pašatunes, i lydžála les nalačhé dromésa.

³⁰Kon marela jakhasa (priščurinélape), odová priduminela čoripén; kon dandyrela péskire uštá, odová keréla čoripén.

³¹Syvo šeró isyn sýrby kralískiri stadyk (koróna) baripnasa, savó isyn pe drom ke čačipén.

³²Kon povolin'kes (liéntes) xoliasóla, isyn fedýr zoralé manušéstyr, i odová, kon rikiréla zor pe péskiro dúho (fáno), isyn fedýr odoléstyr, savó léla fóro.

³³Žrebijo čhurdelape dre angalia (poly), ne kažno mólo saró kerélape Devléskire godiása.