Read Biblija - Pe Baltitko Romani čib (Romanes) 2019 Baltic Romani Bible Pritčy 17 Bible Online

Pritčy 17 - Biblija - Pe Baltitko Romani čib (Romanes) 2019 Baltic Romani Bible bible

Pritčy 17

¹Fedýr isyn šuko maró, ne te javél ramánjo (miro), syr isyn pherdó kher sventoné masesa, ne kaj isyn košybén.

²Godó dynári (sluga) rikiréla zor pe čhavéste, savó keréla ladž, i jov roskerela (rozdela) meknó mištypén maškír pšalénde.

³Dre kakávi (kotlo) bilavena (plavinena) rup, a dre bov suvnakái, ne Raj Devél propatiakirela ile.

⁴Bibahtaló manúš priléla ke godý, so rakiréna načačune uštá, ne xohanó manúš šunéla bedo čib, saví lydžála pe xasibén.

⁵Kon salape čororestyr, odová obrakirela Ras-Devlés, Savó sozdyjá les. Kon radynélape baré bidake, kodoléske javéna viečna mén'ki.

⁶Čhavéngire čhavoré isyn sýrby kralískiri stadyk (koróna) phurané manušénge, čhavé isyn barikane léngire dadendyr.

⁷Syr nahrata manušá na phenéna nisó fededýr, adiáke-pac' i patiaibén isyn, so kralískiri seménca na javéla te xohavél.

⁸Dáro isyn kuč bar dre kodoleskire jakhá, konéste jov isyn: karik xuláj te na risjol, dáro janéla léske mištypén.

⁹Kon učhakiréla nalačhé réndy, odová rodéla ramánjo (miro): ne kon rakiréla pale pal dová, kodová durjakirela fedýr malen (drugen).

¹⁰Fedýr isyn xor te bangiakiren godé manušés, syr šel móly te pekaves dylynes.

¹¹Bibahtaló manúš rodéla jekh, sob (kaj) te buntuinel, paldavá biilytko Jangólo javéla bičhadó pe léste.

¹²Fedýr isyn te dykhespe ričyhasa (miedviedicasa), savjátyr čorde ričoren, syr dylynesa léskire dylnypnasa.

¹³Kon pleskirela pale čoripnasa pal lačhipén, bibáht na javéla te durjol (na otdžala) léskire kheréstyr.

¹⁴Syr léna te košenpe, davá isyn sýrby paní, so mekelape telé, paldavá mek te čingardespe angíl, syr xoliamó košybén lélape.

¹⁵Kon čačakirela (opravdynela) [promekela bang-ju.o.] fujé manušénge, kon bangiakirela čačuné manušés-dalé duje rendéndyr (dielendyr) dur'jela Raj Devél.

¹⁶Vaš so barvalypén dre vastá dylyneste, sob (kaj) te javél godó? Léskiro iló na džinéla, so te kerél lésa.

¹⁷Maleske trej léskire mal dro kažno časo (cýro), čačunó pšal javéla, syr peréla bibáht.

¹⁸Nagod'varo manúš marela pir vastá syr dre symadý (zalogo) i jačélape jakhítko (svidietieljo) pal péskire pašatuneste.

¹⁹Konéske pir iló isyn čoripén, odová vykedéla košybén. Kon ĥazdéla péskiri pórta, odová rodéla xas'kiriben.

²⁰Xohané-iléskiro manúš na lathéla lačhipén; pe manušéste, savéste isyn mižeh čib, peréla bibáht.

²¹Konéste lathelape čhavó, savó isyn bi patyvakiro ke javír manušá, odoléske manušéske javéla kalypén. Dad, konéste isyn dylynin'ko čhavó, na radynélape.

²²Radymakire iléstyr džála sastiakiriben syr drabestyr, ne phagirdó dúho (fáno) šut'kirela kokalý.

²³Fuj manúš čhuvéla myto (vziatka) pale brek, sob (kaj) te risjol čačipnastyr pe séndo.

²⁴Godypén džála angíl jakhá god'varé manušéste, ne dylyneskire jakhá roznašenape pe phuvjákire jagóry (koncy).

²⁵Dylyné čhavestyr kaljola iló dadéste, kirkipen odolé džuvliáke, saví bijandiá les.

²⁶Te sendiakires čačuné manušés isyn namišto, i te mares kralískire barydyrén pal léngiro patiaibén.

²⁷Kon isyn god'varó, odová rakhibnýtkes rakiréla, kon ĥaljola godes, kodoleste dúho (fáno) na kuninelape.

²⁸Až dylynes ginéna pal godeste, kiéli jov isyn štyl; ci kodolés, savó zaphandela péskiro muj, les ĥaljona pal godé-šereskire manušéste.