Read Biblija - Pe Baltitko Romani čib (Romanes) 2019 Baltic Romani Bible Pritčy 18 Bible Online

Pritčy 18 - Biblija - Pe Baltitko Romani čib (Romanes) 2019 Baltic Romani Bible bible

Pritčy 18

¹Manúš, savó durjola javirendyr, rodéla dová, so jov jekh kokoró drieván trebinela, jov isyn scial (proti) saró godó čačipén.

²Dylynin'ko drieván na kaméla te ĥaljol džinybén; ne sob (kaj) jekh te sykavél, so isyn léste pe iló (pe godý).

³Jekhátyr paló fuipén džála bipatyv; a kiéli na déna patýv, tedy i obrakirena.

⁴Manušéskire lavá isyn sýrby xor paningá, i sýrby godypnaskiri ĥanyngori, saví isyn sýrby sýgno thaduno ručajo.

⁵Davá isyn nalačhés te javes pe fujé-manušéngiri rig, ci te raves telé čačuné manušén pe séndo.

⁶Dylyneskire uštá vykharena čingárd, i léskiro muj lydžála ke maribén.

⁷Dylyneskiri čib isyn xasibén vaš léske, i léskire uštá isyn sýrby felý vaš léskiro di.

⁸Kon gundiarinela (šepčynela) pe kan, léskire lavá isyn syr lačhó xabnoro, i jone džána andré dre masá.

⁹Kon isyn nabutitko pe péskiri butý, kodová isyn pšal kodoléske, savó isyn xasiakiribnaskiro.

¹⁰Ráskire-Devléskire lav isyn syr zoralý vučardý (bašnia), čačunó manúš našela dre láte, i tén'či jov isyn bidarakiro.

¹¹Barvalé-manušéskiro mištypén isyn léskiro zoraló fóro, i jov isyn sýrby vučí vánta dre léskire-godiakiri patýv.

¹²Manúš zadelape angíl xasiakiriben, i naphut'kiriben janéla patýv.

¹³Kon otphenéla angíl, syr te šunél, kodová isyn dylynó i ladž léske.

¹⁴Manušéskiro dúho (fáno) rikiréla džides les, kiéli jov isyn nasvaló, ne kon saštý (moginéla) te ĥazdel (te podrikirél) phagirdó dúho (fáno)?

¹⁵Baré-godiákiro iló doreséla džinybén, i godé-manušéskiro kan rodéla džinybén.

¹⁶Manušéskiro taláno keréla dromá manušéske, i janéla les angíl baré manušénde.

¹⁷Pervoneste, kon rakiréla pe séndo, isyn baripén angíl, syr javéla léskiro pašatuno i zumavela (propatiakirela) les phučibnenca.

¹⁸Trej te čhurdén žriébijo, sob (kaj) te terdjol (te pirijačel) čingárd, kiéli zoralé manušá kaména te pirizorjakiren jekh jekhés.

¹⁹Kóli tu dukhavesa (rosholiakiresa) pšalés, tedy isyn pharedyr te riskires pale les, syr te lel zoraló fóro; i čingárd isyn sýrby sastýr pe vudár dre thagaritko tvárdyma (buklo), savjása pšal zaphandelape tútyr.

²⁰Manušéskiro kužum čaljola daléstyr, so rakiréla léskiro muj, jov jačélape čalo péskire uštendyr.

²¹Dre čib isyn zor vaš džiibén, ci vaš meribén. Kon kaméla te rakirél, odoléske trej te užakirel ci jekh, ci javír.

²²Kon lathiá lačhia romniá, kodová lathiá lačhipén i doresciá drógima Rástyr-Devléstyr.

²³Čororó manúš rakiréla sýrby jov mangéla, ne barvaló manúš otphenéla bipatyvakires (dierzkes).

²⁴Manušéske, savéste isyn but drúgi (malá), kokoreske trej te javél malytko (drugitko) ke javír, ne isyn mal, savó isyn butýr pašyledýr túke tyré pšalestyr.