Read Biblija - Pe Baltitko Romani čib (Romanes) 2019 Baltic Romani Bible Pritčy 19 Bible Online

Pritčy 19 - Biblija - Pe Baltitko Romani čib (Romanes) 2019 Baltic Romani Bible bible

Pritčy 19

¹Fedýr te javél čororó manúš, savó dživéla pir čačipén, syr te javél xohané-čibakiro (čibjakiro) manúš i dylynó.

²Isyn namišto, kiéli manušéste nane džinybén, adiáke-pac' i kon sýges psiréla, odová obštavelape (obstempinelape).

³Manušéskiro dylnypén bandiakirela léskiro drom, i léskiro iló ĥazdélape xoliása pe Raste-Devléste.

⁴Barvalé manušéste jačénape but butýr malá, ne čororestyr durjola léskiro malá.

⁵Načačuno jakhítko javéla sendiakirdo, i kodová, kon xohavela, na zrakhélape.

⁶But manušá pekenape pal láska baré randyr, i kažno manúš isyn mal odoléske, kon déla.

⁷Saré pšála čororé-manušéskire drieván na kaména les, pe kicý butýr léskire malá durjona léstyr! Jov moginéla te mangél len pale lavénca, ne jone usajékh mekéna les.

⁸Kon sykljola te javél godedyr, odová pekelape (zabotisola) pal péskiro di; kon jačélape god'varó, odová lathéla lačhipén.

⁹Načačuno jakhítko (svidietielie) javéla sendiakirdo, i kodová, kon xohavela, xasjola.

¹⁰Pes'tima (pyšnyma) na poddžála dylynin'koneske, pe but butýr adiáke-pac' i dynaríske na poddžála te xulainél pe thagar'jende.

¹¹Kon xor rozlela, odová nasyges (povolin'kes) xoliasóla, i kodová keréla baripén péske, kon sýrby na dykhéla, kiéli léske keréna čoripén.

¹²Králi, savó xoliasóla, isyn sýrby ščer (liévo), savó rykinela, léskiri láska isyn sýrby pahlyn (rosa) pe čar.

¹³Dylynó čhavó keréla bari bída dadéske; romný, saví čingardelape, isyn sýrby paní, so peréla i ŭsády (sak) čhinela dre kaná.

¹⁴Kher i barvalypén isyn meknó mištypén dadendyr, ne baré-godiakiri romný isyn dáro Rástyr-Devléstyr.

¹⁵Nabutiakiriben (kirne-masengiripen) lydžála manušés dro xor soiben, i bitalanytko manúš javéla te stradynel bokhátyr.

¹⁶Kon rikirlape ke priphenybén, odová zrakhéla péskiro di. Kon na dykhéla, so jov keréla, kodová meréla.

¹⁷Kon isyn lačhé-dieskiro ke čororé, kodová sýrby déla dro dlugo (pokerela) Ráske-Devléske, Jov pleskirela pale odoléske, kon dyjá.

¹⁸Sykliákir ke dukhá péskire čhavés paka isyn nadiéia i na ker davá pir miéra, sob (kaj) jov te na merél i na dykh pe léskiri gódla.

¹⁹Drieván-xolynakiro manúš javéla te stradynel sendostyr; kóli tu vyrakhesa (potanginesa) les, tedy túke trej javéla te kerés davá nevéstyr.

²⁰Šun, syr déna godý túke, i prilé dová, kóli sykliakiréna tut, sob (kaj) tu moginésa te javes godó dre palatuné (posliednia) dyvesá.

²¹Manúš duminéla but pal saró [manušéste isyn but mysli dro iló-r.s.], ne javéla jekh, pal so Raj Devél déla godý, i jone javéna te kerenpe čačipnása.

²²Manušéskiro kučipén isyn léskiro lačhipén, i čororó manúš isyn fedýr xohanestyr.

²³Kon daréla Devléstyr, kodová dživéla. Konéste isyn dar, odová jačélape čalo, i bibáht na peréla pe léste.

²⁴Nabutitko (kirne-maséngiro) manúš čhuvéla telé péskiro vast dro čaró, i jov až na ĥazdéla vast pale dro péskiro muj.

²⁵Pekav odolés, kon sykavéla bipatyv ke javír, i prostone-godiakire javéna godedyr, vyrakir god'varé manušés i jov javéla te dživél.

²⁶Kon isyn bibahtaló ke péskiro dad, i tradéla javrí péskire da, kodová isyn biladžaipnytko i bipatyvakiro čhavó.

²⁷Pirijač, miro čhavó, te šunés sykliakiribén, savó durjakirela tut godypnaskire lavéndyr.

²⁸Frento jakhítko salape xoliames pe séndo, i fujé-manušéngiro muj nakhavela (glytynela) čoripén (xohaibén).

²⁹Pe odolénde, savé isyn bipatyvakire ke javír manušá, isyn séndo, i pe dylyneskire masá pekaibena (vast te marel).