Read Biblija - Pe Baltitko Romani čib (Romanes) 2019 Baltic Romani Bible Pritčy 20 Bible Online

Pritčy 20 - Biblija - Pe Baltitko Romani čib (Romanes) 2019 Baltic Romani Bible bible

Pritčy 20

¹Mol (vino) sýrby salape, sikiera (zoraló pibén) ĥazdéla šumo, i konés davá zlydžala droméstyr, kodová isyn nagodo manúš.

²Xolynakiro králi isyn sýrby ščer (liévo), savó rykinela, kon les xoliakirela, kodová keréla grého pe péskiro džiibén.

³Manúš keréla patýv péske, kóli jov terdiakirela košybén, ne kažno dylynin'ko manúš délape te čingardelpe.

⁴Kirne-maséngiro manúš na pharavela (na pašynela) phuv ivanta(tes)kiro (zimakiro), jov javéla te mangél, kiéli javéla sčhinyben i nane nisó léste.

⁵Manušéskire godiakire dúmy isyn sýrby xor paní, ne god'varó manúš pharela (vylela) len javrí.

⁶But isyn manušá, savé rosphenena sarénge pal léngiro lačhipén, ne kon lathéla patiaibnytkone manušés?

⁷Čačunó manúš dživéla bi došengiro: léskire čhavé isyn bahtalé paló (poslie) léste.

⁸Králi, kon isyn beštó pe sendariskiro štéto, rosčhurdela sarí xolý (bibáht) péskire jakhénca.

⁹Kon saštý (moginéla) te phenél: “Me kerdjom žužó iló, me som bigrehengiro?”

¹⁰Naroŭna ubladýtka (viesy) i naroŭna miery (tyrdyne) isyn saré duj načačipena, savé isyn džungalé (brydka) Ráske-Devléske.

¹¹Adiáke-pac' i bijatós [terné-beršengires-r.s.] udžinena pir léskire keribena, ci pir léskiri butý, ci joj te javél bidošengiri, ci čačuný.

¹²Kan, so šunéla, i jakh, so dykhéla-isyn dalé duj l'goty, so Raj Devél sozdyjá.

¹³Na kam te soves, sob (kaj) te na javes čororó: otker péskire jakhá i tu javésa čalo marésa.

¹⁴“Bibáht, bibáht!” — rakiréla manúš, kon kinela; ne kiéli jov džála krig, tén'či jov šarelape.

¹⁵Isyn suvnakái, i but kuč bará, ne naj drogedyr kučipén isyn god'varé uštá.

¹⁶Le krig ídia kodoleskiri, kon isyn jakhítko (dudvalo) pal čužoné manušéste i rikir davá, syr symadý pal manušéste rigátyr.

¹⁷Maro, so doreselape xohaibnasa, isyn gudló vaš manušéske, ne tén'či (pozžie) léskiro muj javéla pherdó prahosa barorenca.

¹⁸Kažno godý (duma), so te kerés, risjola dro čačipén, ne jekh, kiéli tu godytkes rozlesa, tén'či džá maribnása.

¹⁹Kon phukavela (piridela), kodová otčhakirela garadé dúmy, paldavá na jav khetané adasavesa, kon otkerela buĥles péskire uštá.

²⁰Kon prokošela péskire dadés, ci péskire da, léskiro momolýtko (svietíl'niko) murdjola maškír xor kalypén.

²¹Mištypén, so doreselape sýges dro anglypén, na javéla bahtiakirdó pe kónco (pe jagóro).

²²Na rákir: “Me adiáke-pac' keráva bibáht pale léske.” Užakir Ras-Devlés i jov déla zor túke.

²³Naroŭna ubladýtka (viesy) isyn džungalé (brydka) Ráske-Devléske, i xohané tyrdyne (giri) davá isyn nalačhipen.

²⁴Raj Devél déla zor manušéngire ĥerenge, karik te džán, syr tén'či manušéske saštý te ĥaljol péskiro drom?

²⁵Davá isyn sýrby felý vaš manušéske te phenél sýges (te del sovél), so davá isyn svénto, i tén'či (pozžie) te piriduminel péskiri sovláh.

²⁶Godó králi rosčhurdela fujé manušén, i janéla pe lénde siavitko (miel'nicytko) rota.

²⁷Manušéskiro dúho (fáno) isyn Devléskiro momolýtko, so piridykhela saró, so isyn andrál manušéste.

²⁸Lačhé-ilýtkima i patiaibén rakhena kralís, i jov rikiréla péskiro trono lačhipnása.

²⁹Terné-manušéngiro baripén isyn léngiri zor; i phuré-manušéngiri gožyma isyn léngiro syvo šeró.

³⁰Dukhane daba [kalé masá maribnastyr-r.s.] žužakirena bibahtalé manušés, adiáke-pac' i pekaibena (daba) žužakirena xor štéty dre manušéste.