Read Biblija - Pe Baltitko Romani čib (Romanes) 2019 Baltic Romani Bible Pritčy 21 Bible Online

Pritčy 21 - Biblija - Pe Baltitko Romani čib (Romanes) 2019 Baltic Romani Bible bible

Pritčy 21

¹Kralískiro iló isyn dre Ráskire-Devléskire vastá sýrby panitka ručai, so thadena: Jov riskiréla len, syr Léske isyn trej.

²Kažnoné-manušéskiro drom isyn čačunó dre léskire jakhá, ne Raj Devél ublavela (važynela) ile.

³Te kerén čačipén i čačunó séndo isyn kučedyr Ráske-Devléske syr svénta dyibená.

⁴Jakhá, savé zadenape, phut'kirdo iló-davá isyn momolýtko (svietíl'niko) fujé-manušéngiro, savó isyn grého.

⁵Dobusovo manúš priduminela dová, so déla pribaripen, ne kodová, savó keréla sygnymasa, javéla dre urieža (ubytko).

⁶Kon kedela kučipén xohané čibása (čibjasa), odová isyn sýrby sýgno balvál, saví rodéla meribén.

⁷Nahratyma fujé-manušéngiro xasiakiréla len, pal-dová so jone na kaména te kerén čačó séndo.

⁸Zlydnia manúš skedelape te kerél čoripén pefromi (smyslosa), ne bidošengire-manušéngire butiá isyn čačuné.

⁹Fedýr isyn te dživés dro kunto pe kheréskiri stréha (čhakín), syr te javes dro jekh kher džuvliása, saví čingardelape.

¹⁰Fuje-manušéngiro di drieván prityrdela bibáht: léskiro pašatuno na lathéla láska dre léskire jakhá.

¹¹Kiéli manúš, savó isyn bipatyvakiro ke javír manušá, sendiakirdo, tedy prostone-godiakire manušá jačénape godedyr, i kiéli sykliakiréna godé manušés, jov kedela džinybén.

¹²Čačunó manúš pridykhelape ke kher, kaj isyn fuj manúš; ne Devél ravela telé fujé manušén pal léngiro fuipén.

¹³Kon zaphandela kan, kiéli čororó manúš déla gódla, kodová adiáke-pac' javéla te del gódla čororipnastyr i les na javéna te šunén.

¹⁴Dáro, savó délape, sob (kaj) nikón te na dykhél, štyliakirela bari xolý, i myto (vziatka), so délape paló dumo, keréla baró xoliakiribén.

¹⁵Davá isyn rádyma vaš čačuné manušéske te kerél pir čačipén, ne xasiakiriben vaš fujé manušéske.

¹⁶Kon džála dre rig čačuné droméstyr, kodová javéla te otkhinjol mulenca pe skedyibén.

¹⁷Kon kaméla lokho džiibén, kodová javéla čororó manúš; konéske isyn pir iló mol i olivítko dzet (jeliejo), kodová na javéla barvaló.

¹⁸Fuj manúš javéla syr vykinybén pal čačuneste, i napatiaibnaskiro pal devlytkoneste.

¹⁹Fedýr te dživás pe čhučí phuv, syr xoliamé džuvliása, saví čingardelape.

²⁰Kaj dživéla godó manúš, odój isyn kučipén i olivítko dzet, ne dylynó rozmekela len.

²¹Kon rodéla i džála duredýr pir čačipén i lačhé-ilýtkima, odová manúš lathéla džiibén, čačipén i patýv.

²²Godó manúš ublavela (važynela) fóro, kaj zoralé manušá isyn, i phagiréla telé foróskiro rikiriben, dro savó jone zoralés patiána.

²³Kon prirakhela péskiro muj i čib, odová manúš rakhéla péskiro džiibén pharipnastyr.

²⁴Phut'kirdo manúš, i manúš, savó zadelape, kharélape bipatyvakiro, jov keréla saró xoliamé phut'kiribnasa.

²⁵Dová, so zoralés trej kirne-masengire manušéske, muliakiréla les, pal-dová so léskire vastá otphenenape te kerén pharí butý;

²⁶jov isyn ĥálko i skempo saró dyvés, ne čačunó manúš déla i na tanginela.

²⁷[1]Fuje-manušéngiro svénto dyibén vykharela džungalypén (brytkima), pe kicý džungaledyr (brytkedyr) isyn davá čuin, kiéli jov janéla svénto dyibén, fujes dumindoj.

²⁸Xohanó jakhítko xasjola (peréla), ne manúš, savó rakiréla saró, so jov džinéla, javéla te rakirél usady (sak).

²⁹Fuj manúš kaštaliakirela péskiro muj, ne devlýtko zoralés džinéla péskiro drom.

³⁰Ni godypén, ni ĥalyibén, i ni savó godypén na terdjona proti Raste-Devléste.

³¹Gres skedéna vaš maribnýtko dyvés, ne zrakhibén javéla Rástyr-Devléstyr.