Read Biblija - Pe Baltitko Romani čib (Romanes) 2019 Baltic Romani Bible Pritčy 23 Bible Online

Pritčy 23 - Biblija - Pe Baltitko Romani čib (Romanes) 2019 Baltic Romani Bible bible

Pritčy 23

¹Syr tu bešesa te xas barydyrésa, to pridykhpe šukár, kon isyn angíl túte;

²i čhuv čhuri ke péskiro kirlo, kóli tu san manúš, savó isyn ĥálko ke xabén.

³Na xa drieván but léskire bonbony (prismaki), pal-dová so jone isyn xohanó xabén.

⁴Na ker butý pir miéra, sob (kaj) te javes barvaló, ne jav pe adákicy godó, sob (kaj) te mekes dasavé dúmy:

⁵kiéli tu riskiresa péskire jakhá pe davá — i akaná nane les? Pal-dová so barvalypén keréla phaká péske i syr órlo (kído) vurniala krig ke bolybén.

⁶Na xa maró ke manúš bibahtalé jakhasa, na jav ĥálko (žadno) ke léskire bonbony (prismaki).

⁷Pal-dová so jov isyn adasavó, savó jov isyn dro péskiro iló. “Ha i pi”, — jov phenéla túke, ne léskiro iló nane túsa.

⁸Kotér (kusko) mareskiro, so tu xajan, tu vyčhadesa, i tu našavesa tyré kuč lavá.

⁹Na rákir dre dylynin'koneskire kaná, pal-dová so jov dykhéla vučipnástyr pe tyré-lavengiro godypén.

¹⁰Na piričhuv ĥaratuny špéra pe phuv, na res pe félda, kaj dživéna bidadengire čhavé.

¹¹Pal-dová so léngiro Vyrakhibnaskiro [Zaterdyipnaskiro-r.s.], Raj Devél isyn zoraló, Jov zaterdjola pal léngiro réndo pe túte.

¹²Bandiakir tyró iló, kiéli sykliakiréna tut, i tyré kaná ke god'varé lavá.

¹³Na tangine (na žalin) čhavés, kiéli tu marésa les raniasa, daléstyr jov na meréla:

¹⁴tu marésa les raniasa i zrakhésa léskiro di liunostyr (adostyr).

¹⁵Mro čháva! Kóli tyró iló isyn godó, tedy miro iló javéla te radynélpe.

¹⁶I miré buke (nutria) javéna zoralés te radynénpe, kiéli tyré uštá phenéna čačipén.

¹⁷Mek tyró iló te na zevlynel (te na zavidynel) grehitkoné manušénge, mek tyró iló te jačélpe ŭsády (sak) dre dar angíl Raste-Devléste;

¹⁸pal-dová so isyn anglypén i tyró lačhó užakiribén na javéla našado.

¹⁹Mro čháva! Šun, i jav godó, i prirakh péskiro iló pe mamúj drom.

²⁰Na jav khetané manušésa, kon p'jela drieván but mol (vino), ci kon xála but mas.

²¹Pal-dová so matymari (matiari) i buté-xabnaskiro manúš (obhaiačo) jačéna čororé, i manúš, kon sovela but, javéla uridó dre melale patave.

²²Šun péskire dadés, konéstyr tu lathianpe, i na dykh vučipnástyr pe péskire date, kiéli joj iavéla phuri.

²³Kin (dores) patiaibén, i na otdé les nikonéske; adiáke-pac' godypén, sykliakiribén i ĥalyibén.

²⁴Čačuné-manušéskiro dad javéla drieván te radynélpe, adiáke-pac' i kodová, konéste godó čhavó lathiape, javéla te bahtaljol léstyr:

²⁵mek te javén ráda tyró dad i daj, i mek kodoia, saví bijandiá tut, zoralés te radynélpe.

²⁶Mro čháva! Otdé mánge tyró iló, i mek tyré jakhá te rikirenpe zoralés (te pridykhenpe) ke miré dromá.

²⁷Pal-dová so nalačhi džuvlý isyn xor ĥanbín (jama), i čúžo džuvlý isyn vensko ĥanýng.

²⁸Joj adiáke-pac' podrakhela doresybén (manušén) syr rozmaribnytko, i barjakiréla butýr napatiaibnaskiren maškír manušénde.

²⁹Konéste isyn roibén? Konéste isyn dukh? Konéste isyn košybén? Kon isyn bída, i kon žalinelape? Konéste isyn daba (kalé masá) ni palsó? Konéste isyn lolypen dre jakhá?

³⁰Davá isyn kodolénde, savé ke korigunó (pozno) uliágo (pora) isyn bešté pašýl mol i kodolende, savé džána te rodén zmiešyndly mol (vino).

³¹Na dykh pe mol, syr joj loljola, syr joj gožes ziainela jagása dre kučyk, syr joj lokhes čhuvélape dro kirlo:

³²dro kónco (dro jagóro) joj dandyrela tut syr sap, i dukhavela syr saplyn (aspido).

³³Tyré jakhá javéna te dykhén pe javire džuvliende, i tyró iló javéla te vyphenel nakuč lavá.

³⁴I tu javésa syr kodová, savó isyn paštó maškirál mórjo (derjáv), syr kodová, savó isyn paštó [sutó-r.s.] vučés pe mačta, i savó phenéla:

³⁵I phenésa: “Jone pekade man, ne me na som dukhado, jone špulde (pihindle) man, i me na džindjom. Kiéli me džangadjovava? Me javáva te rodav usajékh te vypjav nevéstyr (nevés).”