Read Biblija - Pe Baltitko Romani čib (Romanes) 2019 Baltic Romani Bible Pritčy 24 Bible Online

Pritčy 24 - Biblija - Pe Baltitko Romani čib (Romanes) 2019 Baltic Romani Bible bible

Pritčy 24

¹Na zevlyne (na rievnin) bibahtalé manušénge, i na mang zoralés te javes lénca;

²pal-dová so léngiro iló priduminela nahratyma (nasilijo), i léngire uštá rakiréna, sob (kaj) te kerén doš (fuipén).

³Kher ĥazdéna (čhuvéna) godypnasa, i les rikiréna godiása;

⁴i léskire štúby (komnaty) isyn pherdé drogoné i kučoné barvalypnasa.

⁵Godó manúš isyn zoraló; i god'varó manúš pribarjakirela zoralypén ke péskiri zor.

⁶Pal-dová so gódla god'varé-dyibnasa tumé lydžána péskiro maribén; i kaj but isyn manušá, savé déna gódla, odój javéla zrakhibén.

⁷Godypén isyn drieván vučés dylynin'konestyr: jov na otphandela péskiro muj dre pórta.

⁸Kon priduminela te kerél bibáht, odová javéla khardo bibahtiariskiro.

⁹Dylynó priduminela jekh grého, i manušéstyr, savó isyn bipatyvakiro ke javír manušá, rikirnape dre rig (brydinena) javír manušá.

¹⁰Kóli tu peresa dro iló dro trašakiro dyvés, to túte isyn nabari zor.

¹¹Zrákh odolén, savén lydžána pe meribén, i zarikir odolén, savé obštavenape angíl muliakiriben [isyn sendiakirde te merén-r.s.].

¹²Kóli tumé phenéna: “Čačó, ame na džindiam davá”, tedy Kodová, Savó ublavela (važynela) ile, ci na ĥaljola davá? Kodová, Savó rakhéla tyró iló, ci na džinéla Jov davá? I Jov otdéla kažnoné manušéske adákicy, kicý jov isyn mol pal léskire réndy.

¹³Mro čháva? Xa avgín, pal-dová so jov isyn lačhó, i avginytko soto, savó isyn gudló vaš tyró kirlo [smako-ju.o.]:

¹⁴adiáke-pac' javéla vaš tumaró di džinybén pal godypén; kiéli tumé lathné les, tedy isyn anglypén, i tumarí nadiéia na xasjola.

¹⁵Na podrakh te zamares (na pridumin bibáht), pašýl kher, kaj isyn čačunó manúš, tu san fuj manúš, na phagir léskiro otkhinybnytko štéto;

¹⁶pal-dová so čačunó manúš saštý (moginéla) te perél eftá (bitrinéngiro deš) móly i jov uštéla, ne fuj manúš peréla dre bari bída.

¹⁷Na rádynpe zoralés, kiéli tyró vérgo peréla, mek tyró iló te na javél rado, kiéli jov obštavelape,

¹⁸sob (kaj) Raj Devél te na dykhél davá, i te na javél xoliamó, i, sob (kaj) jov te na riskirél péskiri xolý dolé manušéstyr.

¹⁹Na ĥazdepe xoliása pe bibahtalé manušénde, i na zevlyne (na zavidyn) fujé manušénge:

²⁰pal-dová so na javéla anglypén vaš bibahtalé manušénge, fujé-manušéngiro momolýtko (svietíl'niko) murdjola.

²¹Mro čháva! Dar Rástyr-Devléstyr i kralístyr; na jav khetané manušénca, savé zrakirenape te ĥazdén búnto.

²²Pal-dová so jekhátyr (srázu) bari bída javéla pe lénde, i kon džinéla, savó bedypen (bída) javéla léndyr.

²³Ĥáda, isyn godé-manušéngire lavá: “Davá isyn namišto te javes pe vari konéskiri rig pe séndo.”

²⁴Kon rakiréla bangé manušéske: “Tu rakirésa čačipén”, odolés manušypnaskire nácyi javéna te prokošen; Najudýtka manušá javéna fujes te rakirén pal léste;

²⁵pe kodolende, savé bangiakirena fujé manušén, javéna zoralés te radynénpe i drógo bahtiakiribén javéla pe lénde.

²⁶Čačunó otphenybén isyn sýrby čamudypen dre uštá.

²⁷Angledýr ker péskiri butý javriestyr, i počhuv giv pe félda; tén'či ĥázde péskiro kher.

²⁸Na jav xohanó jakhítko (lžesvidietieljo) pe péskire pašatuneste bi pričynakiro, sóske te xohaves péskire ušténca.

²⁹Na rákir: “Me keráva adiáke léske, syr jov kerdiá mánge. Me otdáva pale manušéske pal léskiri butý.”

³⁰Me gijom nabutitkone-manušéskire feldasa i pir vinagradýtko félda, kaj nabaré-godiákiro manúš isyn;

³¹i odój jov sys zabarino phusadytkone bustienca. Léskiri félda sys učhakirdy cuknudiasa (strakivasa), léskiri baruny vánta sys phagirdy telé.

³²Kiéli me dykhcjom, me ĥalyjom, so davá sys kuč, me podumindjom i dorescjom sykliakiribén:

³³nábut soiben, nábut lindra (drjoma), nábut sčhuv vánta te otkhinjon!

³⁴I tyró čororipen javéla sýrby maribnýtko pirangačo i tyrí trébima javéla sýrby manúš mardytkonesa.