Read Biblija - Pe Baltitko Romani čib (Romanes) 2019 Baltic Romani Bible Pritčy 25 Bible Online

Pritčy 25 - Biblija - Pe Baltitko Romani čib (Romanes) 2019 Baltic Romani Bible bible

Pritčy 25

¹Adalé isyn adiáke-pac' Solomonóskire pritčy, savé začhindlé Jezekijaskire manušá. Jezekíia sys králi pir Judéia.

²Davá isyn baripén Devléske te garavel dová réndo, so na trej te džinén manušénge; ne baripén kral'jengiro isyn dre dová, sob (kaj) te rozĥaljol saró pal davá réndo.

³Syr bolybén dro vučypen, i xor isyn phuv, adiáke-pac' i kralískiro iló naštý te rozĥaljos.

⁴Le krig tufta rupéstyr, i léstyr vydžála khoró (sasudo), so javéla lačhó rupunariske (rupeskire mastieroske).

⁵Le krig fujé manušén kralístyr, i léskiro trono javéla te rikirelpe čačipnása.

⁶Na sykáv pes baré manušésa angíl kral'jénde, i na terdjov pe štéto, savó isyn vaš baré manušénge;

⁷pal-dová so isyn fedýr, kiéli phenéna túke: “Jav vučedýr adarík,” syr tut čhuvéna teledýr angíl kralískire barydyrende, konés tyré jakhá dykhné.

⁸Na džá sýges pe séndo, pal-dová so tu na džinésa, so javéla dro kónco (dro jagóro), kiéli tyró pašatuno ladžakirela tut.

⁹Pirirakir tyró réndo tyré pašatunesa kokoresa, i na vyphen čorahanyben javireske,

¹⁰sob (kaj) odová, kon šunéla les, te na sykavél sarénge tyrí ladž, i mavlýn (malva) pal túte te na javél bedytko (nalačhi).

¹¹Lav, so phendló ke štéto, isyn sýrby suvnakuné phabá dre rupeskire khoré (sasúdy).

¹²Lav, savésa godó manúš sykavéla bang odoléske, kon kandéla les, isyn sýrby suvnakuný čen i gožakiriben vykedyné suvnakástyr.

¹³Syr šylypen ivesa dro časo (cýro), kiéli ukedena giv, isyn adiáke-pac' patiaibnaskiro bičhadó manúš vaš odolénge, savé bičhadé les; pal-dová so jov sýrby paniakirela di péskire ráskiro.

¹⁴Syr óbloki i balvál isyn bibryšyndeskire, adiáke-pac' isyn odová, savó šarelape, so jov déla xohanó dáro.

¹⁵Kon dlúges (ĥará) vyrikiréla, odová saštý te patiakirel barydyrés, i kovly čib phagiréla kokalý.

¹⁶Ci lathian (lastian) tu avgín (meda)? Na adákicy, kicý túke trej, sob (kaj) tu te na pirihas, i te na čhades.

¹⁷Na psir but móly ke tyró pašatuno kheré, sob (kaj) jov te na khinjol tútyr, i, sob (kaj) jov te na lel drieván te na kamel tut.

¹⁸Manúš, savó dophenéla xohaibén pe péskire pašatuneste, isyn sýrby kilo, kurtála i maribnýtko bust (striela).

¹⁹Zoralés te patias dre napatiaibnytkone manušéste isyn sýrby nálačho dand ci langaly ĥerój.

²⁰Te bagas giliá smentnone ileske isyn sýrby te les krig léstyr ídia, ci te čhuvés šut (uksuso) pe dab (rana).

²¹Kóli tyró vérgo isyn bokhalo, de léske maró te xal; ci kóli jov kaméla te p'jel, de léske paní te p'jel:

²²paldavá, keri davá, tu kedesa xačkirdé vangara pe léskiro šeró i Raj Devél otdéla mazúri (nagrada) pal dová, so tu sánas lačhó ke vérgo.

²³Paš-ratiakiri (šylale-rigakiri) balvál lydžála ke bryšýnd, i bedytko (čorahany) čib lydžála ke xoliamó muj.

²⁴Fedýr isyn te dživés pe kunto pe kheréskiri stréha (čhakín), syr te javes khetané džuvliása, saví čingardelape.

²⁵Syr šylalo paní vaš di, savéste sys truš (smega), adiáke-pac' isyn lačhí zan (zvies') duratuné themestyr.

²⁶Čačunó manúš, savó peréla angíl fujé manušénde, isyn syr melaly ĥanyngori, i blatuny ĥanýng.

²⁷Davá isyn namišto te xas but avgín, adiáke-pac' i baripén, so manúš kokoró rodéla péske, nane baripén.

²⁸Kon na rikiréla zor pe péskiro dúho (fáno), odová isyn sýrby fóro, so isyn phagirdó telé, i savó isyn bi vantengiro.