Read Biblija - Pe Baltitko Romani čib (Romanes) 2019 Baltic Romani Bible Pritčy 26 Bible Online

Pritčy 26 - Biblija - Pe Baltitko Romani čib (Romanes) 2019 Baltic Romani Bible bible

Pritčy 26

¹Syr iv lynaskiro, i syr bryšýnd, kiéli čhinena giv, adiáke-pac' na poddžála te kerés patýv dylyné manušéske.

²Syr čirikly, saví vurniala odorík i pale i syr bahirka (lastočka), saví vurniala, i saví na bešéla, adiáke-pac' i bipričynakiro prokošybén na risjola dro čačipén.

³Čhupny trej greske, a švar (uzda) trej osloske, i ran (rand') trej vaš dylyneskiro dumo.

⁴Na otphen dylyneske pir léskiro dylnypén, sob (kaj) tu te na javes dasavo, syr jov isyn.

⁵Otphen dylyneske pir léskiro dylnypén, sob (kaj) jov te na javél godó dre péskire jakhá.

⁶Kon bičhavéla dylyné manušés te piridel zan (zvies'), odová sýrby podčhinela ĥerá péske i keréla bibáht (nalačhipen).

⁷Sýrby ĥerá langale manušéske, savé na psiréna mamúj (roŭnes), adiáke-pac' isyn godophenyben dro dylynineskiro muj.

⁸Te kerés patýv dylyneske, isyn dová-pac' syr te phandes kuč bar dre maribnýtko raĥatka.

⁹Godophenyben dre dylyneskire uštá isyn dová-pac', syr phusadytko xrústo (tierno) dre matymariskire uštá.

¹⁰Raj [zoraló manúš-r.s.] keréla pir péskiri godý i léla pe butý dujén: i dylynes, i svakone manušés, savó džála pašýl.[2] Baró Devél, Savó sozdyjá saró, déla dujenge mazúri (nagrada): i dylyneske i odoléske, kon keréla fuipén.[3]

¹¹Syr džukel risjola ke péskire čhadypen, adiáke-pac' i dylynó keréla nevéstyr péskiro dylnypén.

¹²Ci dykhcián tu manušés, savó ginéla pes godé manušésa? Dylynin'kone manušéstyr butýr saštý te užakires lačhipén, syr kadasavé manušéstyr.

¹³Kirne-maséngiro manúš rakiréla: “Xolynakiro ščer (liévo) isyn pe drom. Mižeh ščer isyn pe vulícy (gásy).”

¹⁴Syr vudár risjola pe péskire zaviesy (začhude), adiáke-pac' i kirne-maséngiro risjola pe péskiro čhuibén.

¹⁵Kirne-maséngiro manúš čhuvéla péskiro vast dro čaró, ne léske isyn pharó te lydžas pale vast ke péskiro muj.

¹⁶Kirne-maséngiro manúš duminéla péske, so jov isyn godedyr eftá (bitrinéngiro deš) manušéndyr, savé otphenena baré godypnasa.

¹⁷Kon čhuvéla péskiro nakh dre čúžo čingárd, odová isyn sýrby manúš, savó uhtyléla džukles pal kaná.

¹⁸Sýrby bigodiakiro manúš, kon čhurdéla jag (jagune gloŭni), maribnýtka bustiá (striély) i meribén,

¹⁹isyn adasavó manúš, savó xohavela péskire pašatunes, i rakiréla: “Me féni (tóka) keráva perasa (šutki).”

²⁰Kaj butýr kaštá nane, odój jag murdjola; i kaj nane manúš, savó isyn bi-patyvakiro ke javír, košybén pirijačéla (štyljola).

²¹Syr vangar čhuvéna dre jag te xačol, i kaštá vaš jag, adiáke-pac' isyn čingarduno manúš, kon roshačkirela košybén.

²²Lavá, savé rakiréla manúš, savó ĥundiarinela, isyn sýrby bonbony (prismaki), i jone džána xor andré masá.

²³Ĥalka isyn uštá, i fuj iló isyn sýrby khoró (sasudo), savé isyn šukarjakirde tuftone (xohané) rupésa.

²⁴Odová, kon bidykhela (zoralés na kaméla) javire manušés sýrby garavela davá péskire ušténca, adasavó manúš sčhuvela frentyma (mendrima) dro péskiro iló:

²⁵kiéli jov rakiréla lačhé zaniása (glosasa), ne tu na patia, pal-dová so isyn eftá (bitrinéngiro deš) nalačhé mysli dro léskiro iló.

²⁶Mek léskiri zoralý namilyma isyn učhakirdy léskire frentymasa, ne léskiro fuipén sykadjola angíl saró skedyibén.

²⁷Kon ĥanavela ĥanbín (jama), odová kokoró peréla dre láte, i kon katynela upré bar, pe odoléste bar risjola pale.

²⁸Xohany čib zoralés na vykedéla odolén, savén jov dukhavela, i načačuno muj keréla fuipén.