Read Biblija - Pe Baltitko Romani čib (Romanes) 2019 Baltic Romani Bible Pritčy 27 Bible Online

Pritčy 27 - Biblija - Pe Baltitko Romani čib (Romanes) 2019 Baltic Romani Bible bible

Pritčy 27

¹Na šarpe atasiatune dyvesesa, pal-dová so tu na džinésa, so dyvés janéla túke.

²Mek javír manúš te šarel tut, a na tyró muj; mek te javél čúžo manúš, a na tyré uštá.

³Bar isyn pharó i práho isyn pharovato, ne kiéli dylynó zoralés xoliasóla, davá isyn pharedyr dujendyr.

⁴Baró xoliakiribén isyn bimanušytko, i xolý isyn trašany, ne kon saštý (moginéla) te terdjol proti baró zevlynypén?

⁵Te sykaves bang manušéske angíl jakhá isyn fedýr, syr te sykaves patýv čorahanés.

⁶Dabá (pekaibena) patiaibnytkone malestyr (drugostyr) isyn fedýr vergoskire čamudypnastyr.

⁷Čalo di na dykhéla i pe avgín, ne bokhalé dieske kažno kirko kotér isyn gudló.

⁸Syr čirikly, saví lodela péskire gniazdátyr (kufóstyr), adiáke-pac' isyn i manúš, savó lodela péskire štetóstyr.

⁹Makhiben (mazilki) i gudló thuvliakiriben (kurinyben) zoralés radynena iló, i gudló isyn kažno mal, kon déla godý iléstyr.

¹⁰Na mek péskire males, ci tyré-dadéskire males; na džá ke tyré-pšaleskiro kher dro dyvés, kiéli túte isyn bari bída. Fedýr isyn pašatuno, kon isyn pašyledýr ke tu, syr pšal, savó isyn dur.

¹¹Mro čháva! Jav godó i radyn miro iló, sob (kaj) mánge saštý te javél te otphenav kodoléske, savó obrakirela man.

¹²Baré-godiákiro manúš dykhéla angíl bibáht (bída), i garadjola, a balvalitko manúš džála duredýr i doreséla kára.

¹³Le ídia kodolestyr, savó jacián jakhitkonesa (poručitieljosa) pal čužoné manušéste; i rikir la syr symadý, kiéli jov isyn jakhítko pal javire džuvliáte rigátyr.

¹⁴Kon ĥazdéla šarindoj péskire males zoralé zaniása (glosasa) tasiárles (ránes) pe zlóko (pe ránko), davá moginéla te zaginelpe syr prokošybén léske.

¹⁵Pani, so ŭsády (sak) peréla dro bryšyndytko dyvés, i džuvlý, kon usady (sak) čingardelape, isyn šerá (rávnes):

¹⁶kon sučhakirela la; odová sýrby obrikirela balvál, i sýrby léskiro čačó vast rikiréla olivítko dzet (jeliejo).

¹⁷Sastýr vostrinela sastýr, adiáke-pac' manúš vostrinela lačhipén péskire maleste.

¹⁸Kon rakhéla inžyritko kašt (smokovnica), kodová javéla te xal léskiri phabaj; adiáke-pac', kon prirakhela péskire xulás, odová javéla dre patýv.

¹⁹Syr dro paní muj sykavéla, savó jov isyn; adiáke-pac' i manušéskiro iló sykavéla, savó manúš isyn.

²⁰Liúno (ado) i Avvadono (mulykano štéto) nijékhvar nane pherdé, adiáke-pac' i manušéskire jakhá nijékhvar nane čale.

²¹Dre kakávi (kotlo) bilavena rup, a dro bov suvnakái, ne, savó manúš isyn, sykavéla mavlýn (malva), saví phenéna javír manušá.

²²Mek tu te toŭčynes (te kures) dylynes dre stupa toŭkačosa, ne usajékh léskiro dylnypén na durjola léstyr,

²³Dykh kučes pal péskiro bakrengiro gurto, i pridykh mištés pal péskiri kherítko stada:

²⁴pal-dová so barvalypén nane pe saré viéki, i, kralítko stadyk (koróna) ža na jačélape pe saré ródy?

²⁵Khas ukedena krig i jalý (sviážo) čar sykadjola, i bergitka zelena čarjá skedéna.

²⁶Bakré isyn túke vaš uribén, i buzne (kozly) isyn vaš túke, sob (kaj) te den lové pe feldakiri timín;

²⁷túke javéla te uhtylel (te javél dósi) buznytko (kozlytko) thud vaš tyró xabén, vaš xabén tyré kheritkonenge, i te čaliakiren tyré dynaricen.