Read Biblija - Pe Baltitko Romani čib (Romanes) 2019 Baltic Romani Bible Pritčy 28 Bible Online

Pritčy 28 - Biblija - Pe Baltitko Romani čib (Romanes) 2019 Baltic Romani Bible bible

Pritčy 28

¹Fuj manúš našela krig, kiéli nikón na tradelape pal léste, ne čačunó manúš isyn murškanó syr ščer (liévo).

²Kóli fuj réndy (diély) isyn pe daja phuv, tedy kralískire barydyrá paruvena jekh jekhés. Ne godiákiro barydyró, savéste isyn džinybén, javéla te kralinél duredýr.

³Čororó manúš, kon pritasavela javire čororé manušés, isyn sýrby zoraló bryšýnd, so na jačkiréla patria (listy) pe kaštá (drevy): [savó zmorela maró pe félda-r.s.].

⁴Odolé, savé mekéna Devléskiro Zakóno, šarena fujé manušén, ne kodolé, savé rikirenape ke Zakóno, isyn proti lénde.

⁵Bibahtalé manušá na ĥaljona čačipén; ne odolé, savé rodéna Ras-Devlés, ĥaljona saró.

⁶Fedýr isyn čororó manúš, kon keréla saró lačhés, syr jekh manúš, kon keréla fuipén pefromi (naročnes), mek jov i te javél barvaló.

⁷Kon rikirélape ke Zakóno, kodová isyn god'varó čhavó, ne kon isyn čhučé-šereskiro manúš, odová ladžakirela péskire dadés.

⁸Kon pribarjakirela péskiro mištypén načačune kofosa (rostosa) i xohaibnasa, kodová sýrby kedela lové kodoléske, savó javéla te tanginél čororen.

⁹Kodoleste, kon riskiréla krig péskiro kan, sob (kaj) te šunél Zakóno, adasaveste až i léskiro mangipén Devléske isyn džungaló (brydko).

¹⁰Kon keréla adiáke, so devlýtka džána dre rig pe bibahtaló drom, kodová kokoró peréla dre ĥanbín (jama), so jov vyĥanadia, a bidošengire manušá doreséna lačhipén dro mištypén.

¹¹Barvaló duminéla péske, so jov isyn godó, ne god'varó čororó manúš rozĥaljola les.

¹²Kiéli čačuné manušá zoralés radynénape, tedy sýrby baró svénko isyn. Kiéli fuj manušá ĥazdénape, to manušá garadjona.

¹³Kon garavela péskire gréhi, odoléske na javéla mištó, ne kon pridžinela gréhi i mekéla te kerél len, kodolés Devél tanginela.

¹⁴Bahtaló isyn manúš, kon usady (sak) patyvása daréla Devléstyr, ne kon pharjakirela péskiro iló, kodová peréla dre bari bída.

¹⁵Syr ščer (liévo), savó rykinela, i syr rič, savó isyn xolynakiro, isyn fuj barydyró, savó xulainela pe čoré manušénde.

¹⁶Themeskiro barydyró, kon isyn na god'varó, pritasavela péskire manušén: ne kon na vyrikiréla ĥalkima (žadnyma) ke lové, odová javéla ĥará (dlúges) te dživél.

¹⁷Manúš, kon pročhudia javire-manušéskiro rat, isyn bangó, jov javéla te našél ke ĥanbín: i nikón na jačélape pašýl léste.

¹⁸Kon dživéla bi došakiro, kodová javéla zrakhno, ne kon psiréla čoré droménca pefromi, kodová peréla pe jekh léndyr.

¹⁹Kon keréla butý pe péskiri phuv, odová javéla čalo marésa; ne kon džála pal lokhe-godiakire manušénde, kodová javéla drieván čororó.

²⁰Patiaibnýtko manúš isyn barvaló bahtiakiribnasa, ne kon kaméla sýges te rozbarvaljol (te javél barvaló), odová na udžala karatyr.

²¹Davá isyn namišto te javes pe vari-konéskiri rig, pal-dová so i pal kotér maró adasavó manúš keréla čoripén.

²²Manúš bibahtalé mysliasa kaméla sýges te rozbarvaljol, i jov na džinéla, so čoripén peréla pe léste.

²³Kon sykavéla bang javire manušéske, kodová lathéla butýr láska parikiribnasa, syr kodová manúš, kon šarela javire manušés na iléstyr.

²⁴Kon čorela dadéstyr ci datyr i rakiréla: “Davá nane grého”, kadasavó manúš isyn drógo drúgo (mal) kodoléske, savó xasiakiréla saró.

²⁵Phut'kirdé-iléskiro manúš vykharela košybén, ne kon zoralés patiála dre Raste-Devléste, kodoléske javéla mištypén.

²⁶Kon zoralés patiála péskire ileske, kodová isyn dylynó, ne kon godes dživéla, kodová javéla zrakhno.

²⁷Kon déla čororeske, kodoleste na javéla nauhtylyben/na javéla nádosi (kodová na čorjola), ne kon zakerela léskire jakhá, pe kodoleste javéna but prokošybena.

²⁸Kiéli fuj manušá ĥazdénape, tedy manušá kokoré garadjona, a kiéli jone xasjona, tedy čačuné manušá jačéna butýr.