Read Biblija - Pe Baltitko Romani čib (Romanes) 2019 Baltic Romani Bible Pritčy 29 Bible Online

Pritčy 29 - Biblija - Pe Baltitko Romani čib (Romanes) 2019 Baltic Romani Bible bible

Pritčy 29

¹Manúš, savó pharjakirela (žestočynela) péskiri men, na dykhí pe dová, so léske but móly sykavéna léskiri bang, jekhátyr (srázu) xasjola, i na javéla sastiakiriben léske.

²Kiéli čačuné manušá rikiréna zor dro kralipén, to manušá zoralés radynénape; ne kiéli fuj manúš kralinela, to tedy manušá rovena.

³Konéske trej godypén, kodoleskiro dad, radynélape, ne kon isyn drógo mal nalačhé džuvlienge, kodová našavela péskiro mištypén.

⁴Králi rikiréla zor pe phuv čačuné sendosa, ne kon léla myty (vziatki), kodolés péskiri phuv ravela telé.

⁵Kon šarela na iléstyr péskire pašatunes, kodová rosčhuvela felý léskire ĥerenge.

⁶Bibahtaló manúš peréla dre felý péskire čoré rendéndyr; ne čačunó manúš javéla te radynélpe.

⁷Čačunó manúš roskedela (rozlela) čororé-manušéngiro réndo, ne fuj manúš na ĥaljola davá.

⁸Manúš, kon salape nahrates, sýrby phandela fóro feliasa, ne godé manušá riskirena xolý dre rig [biladžaipnytka manušá ĥazdéna búnto dro fóro, a god'varé štyliakirena búnto-r.s.].

⁹Kiéli godó manúš isyn proti dylyneste pir réndo, ci dylynó salape, ci xoliasóla usajékh nane ramánjo (miro).

¹⁰Manušá, savé isyn ĥalka (žadna) te pročhuven javireskiro rat, lénge zoralés na pir iló bidošengire manušá, ne čačipnytka (praviedna) manušá pekenape (zabotisona) pal adasavé manušénde.

¹¹Dylynó vyphenela sarí xolý, so léste isyn pe godý; ne godó manúš pririkirela la dre péste.

¹²Kóli themeskiro barydyró riskiréla iló (šunéla) ke xohaibén, tedy saré dynárja jačéna xohané léste.

¹³Čororó manúš i léskiro pritasaibnaskiro poddžana jekh pe jekhéste dro jekh: Raj Devél déla dud (svéto) jakhenge dujenge.

¹⁴Kralískiro trono, kon sendiakiréla čororen pir čačipén, javéla ŭsády (sak) te rikirél zor.

¹⁵Kóli čhavores sykliakiréna pharés i raniasa (rozgasa), tedy jov jačélape godedyr. Ne kóli čhavoró meknó kokoró péske, to jov ladžakirela péskire da.

¹⁶Kiéli fuj manušá javéna usá butýr i butýr, tedy fuipén barjola, ne čačuné manušá javéna te dykhén, syr jone peréna.

¹⁷Sykliákir ke dukhá čhavés, i jov déla túke otkhinyben, i jov obradynela tyró di.

¹⁸Kaj nane sykadyipen upralestyr, odój manušá na obrikirena pes, ne bahtaló isyn odová, kon rikirélape ke Zakóno.

¹⁹Tu na vysykliakiresa pisharís pal doša (promekibena) lavénca, mek jov i ĥaljola, ne usajékh jov na javéla te kandel.

²⁰Ci dykhcián tu manušés, savó sýges vyphenela lavá? Butýr lačhipén saštý te užakires dylynestyr, syr kadasavé manušéstyr.

²¹Kon bučynela (piestinela) péskire dynarís tyknal, tén'či kadasavó pishári zakaméla te lydžál pes syr čhavó.

²²Xoliamó manúš vykharela (zalydžala) košybén, i xolynakiro manúš keréla but čoré réndy (grého).

²³Kon phutjola, kodová peréla telé, ne naphut'kirdo dro dúho (fáno) manúš doreséla patýv.

²⁴Kon isyn khetané čoresa, odová manúš sýrby zoralés isyn na pir iló kokoró péske: jov šunéla syr prokošena les, ne jov na sykavéla les.

²⁵Kon daréla manušéndyr, kodová sýrby čhuvéla felý péske, ne kon zoralés patiála dre Raste-Devléste, odová javéla bidarakiro.

²⁶But manušá rodéna, sob (kaj) te javén kuč theméskire barydyrésa, ne kažno manúš doreséla čačipén Rástyr-Devléstyr.

²⁷Čačuné manušá džána krig (brydinena) načačune manušéndyr, ne devlýtka manušá rikirnape dre rig fujé manušéndyr.