Read Biblija - Pe Baltitko Romani čib (Romanes) 2019 Baltic Romani Bible Pritčy 30 Bible Online

Pritčy 30 - Biblija - Pe Baltitko Romani čib (Romanes) 2019 Baltic Romani Bible bible

Pritčy 30

¹Aguroskire godypnytka lavá, Iakiejoskire [Jakejaskire-ju.o.] čhavéskire, savé phendiá adavá manúš Ifiiloske, Ifiiloske i Ukaloske.

²Čačó, me som butedýr nabaré-godiákiro manúš, syr saré bura manušá (nievieždy), i me na som god'varó manúš.

³Me na vysyklyjom godypnaske, i mánde nane džinybén, syr sventonende.

⁴Kon ĥazdyjápe pe bolybén i gijá telé? Kon skedyjá balvál dre Péskire burnyka (žmieni)? Kon učhakirdiá paniá idiasa? Kon začhudia phuvjákire jagóry (kraí)? Savó isyn Léskiro lav; i savó isyn Léskire-Čhavéskiro lav, kóli tu džinésa?

⁵Kažno Devléskiro lav isyn žužó: jov isyn ščýto odolénge, kon risjola ke Jov te zrakhelpe.

⁶Na pričhúv butýr ke léskire lavá, sob (kaj) Jov te na bangiakirel tut, sob (kaj) tu te na javes xohanó.

⁷Pal duj čačipená me mangavas tut, na otphenpe angíl mánde angíl, syr me meráva:

⁸le krig mándyr frenta lavá i xohaibén, na de mánge ni čoripén, ni barvalypén, čaliakir man marésa, so trej mánge pe kažno (sváko) dyvés:

⁹sob (kaj) me te na javav drieván čalo, i te na otphenavpe Tútyr, i te na phenáv: “Kon isyn Raj Devél?” Ci, sob (kaj) me te na javav čororó i te na čorav, sob (kaj) me te na propatiakirav miré-Devléskiro lav.

¹⁰Na kaliakir lavésa dynarís angíl léskire raste, sob (kaj) jov te na prokošel tut, i sob (kaj) tu te na javes bangó.

¹¹Isyn ródo, savó prokošela dadés, i na šarela péskire da.

¹²Isyn ródo, savó isyn žužó angíl péskire jakhá, ne jov isyn na mordo péskire meliatyr.

¹³Isyn ródo, kaj lákire manušénde, isyn phut'kirdé jakhá. Syr vučés ĥazdénape léngire cymbly (riesnicy)?

¹⁴Isyn ródo, dre savó manušénde dandá isyn syr kurtála, i koneskire žandy isyn syr čhurja i skedyné te pohan sarésa čororen pe phuv i bogen maškír manušénde.

¹⁵Ratpibnaskireste (pijavkate) [dro načalypen-r.s.] isyn duj čhaja, savé déna gódla: ‘De! De!’ Isyn trin čačipená, savé nijékhvar nane čale. Isyn štar vieščy, so nijékhvar na phenéna: ‘Uhtýlla (dósi).’

¹⁶Davá isyn: maĥila (kula), i bibijatengiri džuvlý; phuv, saví nane čaly paniéstyr, i jag, saví te phenél: ‘Uhtýlla.’”

¹⁷Manušéste, kon prosala dadés, i kon salape xoliames, sob (kaj) te na kandel péskire da, to léske koraki, so isyn pe dólo, vyhana léskire jakhá, i terné orly (kidore) shana len sarésa.

¹⁸Isyn trin čačipená, so isyn drieván dívna vaš mánge, i isyn štar čačipená, so me na ĥaljovava:

¹⁹syr órlo (kído) vurniala pir bolybén; syr sap kharélape (dviginelape) pir bérga, syr párma (korabljo) kharélape (plyvinela) pir mórjo (derjáv), syr murš keréla drom ke patyvalý čhaj.

²⁰Ake, syr nalačhi džuvlý keréla: joj xála, i khosela péskiro muj, i joj rakiréla: “Me na kerdjom ni savó fuipén.”

²¹Isyn trin čačipená, so léndyr phuv izdrala, i štar čačipená, so joj naštý te vyrikirel (te pirilydžal):

²²kóli pishári léla te kralinél, i kiéli dylynó isyn čalo marésa;

²³kóli bipatyvakiri džuvlý džála paló rom, i kóli dynárica (služanka) léla lákire-raniakiro štéto.

²⁴Áke, štar tykné džidale, ne jone isyn drieván godé:

²⁵kirja (muraški), jone isyn nazorale; ne jone lynaskiro kedena xabén péske;

²⁶bergitka karmusa (myšy), savé isyn nabaré-zorjakire, ne jone keréna péske kherá pe skaly.

²⁷Skočkende (sarančate) nane králi, ne jone džána angíl saré pir linija.

²⁸Mizgirjo (pauko), sava džinéla te uhtylelpe péskire lapkenca, ne jov javéla dre kralískire felatiniá.

²⁹Isyn trin džidale, savé štavena rajkanes, i štar, savé pir linija džána angíl:

³⁰ščer, savó isyn naj (sámo) zoraledýr maškír saré murdalénde, i savó na risjola krig ni konéstyr;

³¹graj, i buzno (kozlo), i králi, proti konéste nijékh naštý (na moginéla) te ĥazdelpe.

³²Kóli tu bigodiakires šardian pes ke vučipén, ci pridumindian bibáht, čhuv péskiro vast pe muj.

³³Kon zmarela thud, kodová keréla ksil, ci kon tasavela nakh, kodová ratvaliakirela nakh; i adiáke-pac' kon ĥazdéla xolyn, kodová zalydžala košybén.