Read Biblija - Pe Baltitko Romani čib (Romanes) 2019 Baltic Romani Bible Pritčy 31 Bible Online

Pritčy 31 - Biblija - Pe Baltitko Romani čib (Romanes) 2019 Baltic Romani Bible bible

Pritčy 31

¹Kralískire-Liemuiloskire lavá. Uphenybén, savésa léskiri daj sykliakirdiá les:

²So, mro čháva? So čháva, savó san miré ločoviátyr? So čhavó, miré sovlahatyr?

³Na otdé sarésa tyrí zor džuvlienge, ci na otdé pes odoléske, so xasiakirdiá kral'jén.

⁴Davá isyn na vaš kral'jenge, o Liemuilo, davá isyn na vaš kral'jenge te p'jen mol, ci theméskire barydyrénge te phučén: “Kaj isyn zoraló pibén?”:

⁵sob (kaj) jone te na matjon, i sob (kaj) jone te na bistren pal zakóno, i sob (kaj) jone te na riskirén čačipén odoléndyr, savén pritasavéna.

⁶De zoraló pibén kodoléske, kon isyn xasibnýtko, i mol kodoléske, savéske isyn kirko pe iló:

⁷mek jov te p'jel, i te bistrel pal péskiro čororipen, mek jov te na ripirel butýr pal péskiri bari bída.

⁸Rákir pal manušénde, savé na rakiréna, i pal réndo odolengiro, savén mekné.

⁹Rákir pal odolénde, savén pritasavéna, i pal bogénde; sendiakir len pir čačipén i risjov ke léngiro čačipén.

¹⁰Kon lathéla bidošengirja (lačhé-ilytkona) džuvliá? Lákiro kučipén isyn drogedyr rubinendyr.

¹¹Lákire-romeskiro iló javéla te patial dre láte bi darákiro; i léste na javéla nauhtylyben (nádosi) ni dro so.

¹²Joj keréla lačhipén léske, a na bibáht, dre lákire džiibnáskire saré dyvesá.

¹³Joj rodéla [doreséla-r.s.] pošom (šers') i ĥandlado (ljono), i joj keréla butý iléstyr péskire vasténca.

¹⁴Joj isyn sýrby tylgariskire pármy (korabli): joj ianéla péskiro xabén duripnastyr.

¹⁵I joj uštéla, kiéli iščo (inké) rat isyn, i joj déla te xan péskire kheratunenge, i dyvesýtko butý péskire dynaricenge.

¹⁶Joj duminéla pal félda i kinela la; joj mierkinela te kinel vinagrádniko pal kófo, so jandlé lákire vastá.

¹⁷Láte isyn bari zor, i joj pharés keréla butý vasténca.

¹⁸Joj ĥaljola angíl, so lákiro réndo isyn lačhó, i so lákiro momolýtko na murdjola ratý.

¹⁹Joj protyrdela vastá ke prialka (katlý), i lákire vastá rikiréna khuvitko rota.

²⁰Joj podela péskiro vast čororenge, i joj tyrdela péskire vastá ke bógi.

²¹Joj na daréla ivestyr pal péskiri semia (iri), pal-dová so sarí lákiri semia uridy dre taty ídia.

²²Joj keréla péske cergi pe čhuibén; joj ur'jelape dro kuč than (matier'ialo) i dro purpuro.

²³Lákire romes džinéna pašýl foritko pórta, kiéli jov isyn beštó maškír godephurende pe doiá phuv.

²⁴Joj keréla cergi (pokryvaly) i biknela len, i joj doreséla baré kustyka tylgar'jenge (kupcenge) Finikijakirenge.

²⁵Joj sýrby isyn uridy dro zoralypén i patýv; joj radynélape dyveséstyr, so javéla angíl.

²⁶Joj rakiréla godes, i lákiri čib déla lačhó godypén.

²⁷Joj dykhéla pal péskiri semia (iri), i joj na xála maró, so joj na zakerdia.

²⁸Lákire čhavé šarena i bahtaliakirena la; adiáke-pac' i lákiro rom, kon šarela la.

²⁹But džuvliá keréna adiáke, ne tu san fedýr saréndyr.

³⁰Gožyma xohavela i šukaripén isyn pe menta (minuta), ne džuvliá, saví daréla Rástyr-Devléstyr, javéna te šarén.

³¹Den láke dová, so joj isyn mol pal lákire vastá; i mek lákire butiá te šarén la pašýl pórta (vráty)!