Read Biblija - Pe Baltitko Romani čib (Romanes) 2019 Baltic Romani Bible Pritčy 4 Bible Online

Pritčy 4 - Biblija - Pe Baltitko Romani čib (Romanes) 2019 Baltic Romani Bible bible

Pritčy 4

¹Šunén, tumé čhavále, syr dad sykliakiréla tumen i riskirén godý, sob (kaj) xor i buĥles te ĥaljon.

²Dová, so me sykliakirava tumen, isyn lačhipén: na mek miro zakóno (sykliakiribén).

³Kiéli me, Solomóno, sómas miré dadéskiro, (Davidóskiro) čhavó, drógo i jekhoro angíl miré dákire jakhá,

⁴to miro dad adiáke-pac' sykliakirdiá man i phendiá mánge: “Mek tyró iló te ripirel miré lavá: ríkirpe ke miré priphenybená i dživ.

⁵Sykljov te javes godedyr, sykljov xor i bugles te ĥaljos, na bistyr davá, na risjov krig miré lavéndyr, so me rakiráva.

⁶Na mek godypén, i jov javéla te rakhél tut; rikir syr drógima les i godypén javéla te dykhél rakhibnýtkes pal túte.

⁷Godypén isyn baró réndo, sykljov te javes godedyr, i sykljov te ĥaljos saró, so túte isyn.

⁸De bari čol (timín) godypnaske i jov ĥazdéla tut: godypén janéla patýv, syr tu prilesa ilésa les.

⁹Godypén čhuvéla pe tyró šeró bahtalypnaskiri šukár viánka, janéla patyvakiri koróna túke.”

¹⁰Šun, miro čhavó, prilé miré lavá, i tu javésa te dživés but berš.

¹¹Me sykliakirdjom tut godé dromeske, me lydžijom tut čačuné dromorenca.

¹²Syr tu džása, tyré ĥerá na javéna te štaven pharipnasa; i, kiéli tu prastasa, to tu na javésa te obštavespe.

¹³Rikirpe zoralés ke čačunó sykliakiribén, na bistyr pal léste: rakh les, pal-dová so davá sykliakiribén isyn tyró džiibén.

¹⁴Na terdjov pe dromoro, kaj isyn bidevleskire; na psir čoré-manušéngire dromésa:

¹⁵ríkirpe rigasa, na lode dalé dromoresa, risjov krig léstyr i džá mamúi.

¹⁶Pal-dová so soiben na léla fujé manušén, angíl, syr jone te kerén čoripén, i léngiro sunó džála krig léndyr angíl, syr jone te kerén adiáke, sob (kaj) vari-kon te perél (te xasjol).

¹⁷I jone xána maró fujé rendéndyr, jone p'jena mol (vino), so doresné nahrates (zorjása).

¹⁸Ne čačuné-manušéngiro drom isyn sýrby dud (svéto), so ziainela, savó svencynela i ziainela jarkedyr angíl parnó dyvés.

¹⁹Ne drom fujé-manušéngiro isyn sýrby ciamlypén; jone na džinéna, pir so jone obštavenape.

²⁰Míro čhavó! Prilé ilésa dová, so me phenáva; pričhúv tyró kan (prišunpe) ke miré lavá.

²¹Mek jone te na džán krig tyré jakhéndyr, rakh len maškirál tyró iló.

²²Pal-dová so jone isyn sýrby džiibén kodolénge, kon lathéla len i sastypen saré léngire masenge (ločake).

²³Rakh péskiro iló butedýr saréstyr, so isyn drógo túke. Pal-dová so léstyr thadéla ĥanýng, saví déla džiibén.

²⁴Rískir péstyr xohany čib, i uštá, so isyn frenta.

²⁵Mek tyré jakhá te dykhén mamúi, mek tyré cymbly (riesnicy) te dykhén mamúj angíl túte.

²⁶Produmin mištés, karik tyrí ĥerój džála (lydžála), mek saré tyré dromá te lydžán tut bi darákiro.

²⁷Na rískir (na risjov) nji pe čačí (pravo) nji pe zérvo (liévo) rig; le (otlydža) krig tyrí ĥerój čoripnástyr.