Read Biblija - Pe Baltitko Romani čib (Romanes) 2019 Baltic Romani Bible Pritčy 6 Bible Online

Pritčy 6 - Biblija - Pe Baltitko Romani čib (Romanes) 2019 Baltic Romani Bible bible

Pritčy 6

¹Míro čhávo! Kóli tu jacián sýrby symadý (zalogo) / porenčyndianpe pal tyré maleste (drugoste), ci kóli tu mardian pir vastá sovlahasa pal čužoné manušéste,

²tedy tu pyjan dre felý péskire lavéndyr, tyré-moskire lavá uhtyldé tut.

³Ake, miro čhavó, syr te vyterdes pes, kóli tu pyjan dre péskire maleskire vastá: džá i per ke léskire ĥerá (bandjov telé), mang zoralés te mekel tut tyró mal.

⁴Mek te na soven tyré jakhá, i mek te na den lindra (na drieminen) tyré cymbly (riesnicy).

⁵Zrákh pes syr gazel' karedynitkonéskire (ohotnikóskire) vastéstyr, i syr čirikly manušéskire vastéstyr, savó uhtyléla (starela) čiriklen.

⁶Džá ke kiri (muraška), tu kirne-maséngiro, pridykhpe, syr i so joj keréla, jav godó:

⁷kirjate nane ni ras, ni dykhibnaskires, ni barydyrés,

⁸ne joj keréla zapasy lynaskiro, i joj kedela xabén, kiéli sčhinyben džála.

⁹Kicý tu javésa te pasjos, kirne-maséngiro! Kiéli tu uštesa soibnastyr?

¹⁰Kóli nábut sovesa, nábut désa lindra, nábut butýr sčhuvesa vastá te otkhinjon,

¹¹tedy tyró čoripén javéla syr rozmaribnaskiro, savó lodela i javéla tyrí trébima syr maribnaskiro manúš.

¹²Frento (xartytko) manušoro isyn fuj manúš, savó psiréla rozmekne mósa,

¹³Jov marela (mirginela) péskire jakhénca, jov sýrby rakiréla péskire ĥerénca, jov sykavéla péskire anguštenca (pal'cenca).

¹⁴Léskiri godý isyn rozmekny, jov usady (sak) priduminela čoripén, jov keréla adiáke, sob (kaj) manušá te čingardenpe.

¹⁵Paldavá jekhátyr léske javéla bari bída: jekhátyr jov javéla dukhado bi drabakiribnaskiro.

¹⁶Ake, isyn šov čačipená, so Raj Devél drieván na kaméla; ĥáda, eftá (bitrinéngiro deš) čačipená, savé isyn džungalé Léske:

¹⁷phut'kirdé jakhá, xohany čib i vastá, so pročhuvena bibangipnaskiro rat;

¹⁸godý, saví priduminela fuj réndy; ĥerá, savé sýges prastána ke čoripén;

¹⁹načačuno dudvalo /iakhítko (svidietieljo), savó xohavela, i manúš, kon podhačkirela xolý maškír pšalénde.

²⁰Miro čhavó! Rikirpe zoralés ke tyré-dadéskiro priphenybén, na mek dová, vaš so daj sykliakiréla tut:

²¹priphande len ke tyró iló pe ŭsády (sak), i phande len trusciál men.

²²Kiéli tu džása vari-karik, léngire lavá javéna te lydžán tut; i jone javéna te rakhén tut, kiéli tu javésa sutó; kiéli tu džangadjosa (prošninesape), jone javéna te rakirén túke, so te kerés.

²³Pal-dová so dadéngiro priphenybén isyn momolýtko (svietíl'niko), i léngiro sykliakiribén isyn dud. Kóli jone sykliakiréna dukhanes tut, davá jekh isyn vaš dová, so trej dro džiibén:

²⁴te rakhél tut krig fujé džuvliatyr, čužoné-džuvliakire xohané čibatyr.

²⁵Na tradepe pal lákiro šukaripén, na domek, sob (kaj) joj te zatyrdel tut lákire cymblenca (riesnicenca).

²⁶Pal-dová so biladžakuny džuvlý péskire biladžaipnasa čorjakirela manušés ke labo maró, a džuvlý, saví keréla biladžaipén, sýrby čorjola pe léskiro drógo džiibén.

²⁷Ci moginéla manúš te čhuvél jag pal péskiri brek i, sob (kaj) léskire ídi te na prohačon?

²⁸Ci moginéla manúš te džal pir xačkirdé vangara i, sob (kaj) léskire ĥerá te na obhačon?

²⁹Dová-pac' isyn kodolé manušésa, savó psiréla ke péskire-pašatuneskiri romný: kóli vari-kon čilavéla (čepinela) la, kodová na jačélape bibangipnaskiro (na javéla na bangó).

³⁰Manušá na primangena čoreske, kóli jov čorela, sob (kaj) te javél čalo, kiéli jov bokhaljola:

³¹ne kóli lathéna les, ten'cji jov javéla bangó te del pale eftá móly butedýr; léske prijavelape te otdél saró léskire kheréstyr.

³²Kodoleste, kon keréla biladžaipén javire džuvliása, isyn nábut godý. Kóli manúš keréla davá, jov sýrby xasiakiréla kokoró pes.

³³Jov doreséla daba (maribén) i bipatyv (ladžakiriben), i léskiro obrakiriben jačélape pe léste.

³⁴Pal-dová so zevlynypén vykharela lákire-romeskiro xoliakiribén, i jov na javéla te tanginél (te žalinel) dro dyvés, syr javéla te dukhavel pale.

³⁵Jov na priléla ni savó vykinybén, jov na javéla štyl, mek tu i désa léske but dáry.