Read Biblija - Pe Baltitko Romani čib (Romanes) 2019 Baltic Romani Bible Pritčy 9 Bible Online

Pritčy 9 - Biblija - Pe Baltitko Romani čib (Romanes) 2019 Baltic Romani Bible bible

Pritčy 9

¹Godypén čhudiá péskiro kher, jov vyčingirdia péske eftá (bitrinéngiro deš) stýlby;

²jov čhindiá péskire murdalén (žyvotnonen), jov zmiešyndia péskiri mol (vino), jov adiáke-pac' kerdiá péskiro skamínd (xabén).

³Godypén bičhadiá angíl péskire dynaricen, jov kharéla ke pe naj vučedyršone šteténdyr dro fóro:

⁴“Kon isyn nabaré — godiákiro, risjov adarík.” Odoléske, savó but na ĥaljola, godypén phendiá:

⁵“Javén, xan miro maró i p'jen mol (vino), saví me zmiešyndjom.

⁶Mekén dylnypén, sob (kaj) te dživén, psirén god'varé dromésa.”

⁷Manúš, kon sykavéla bang javire manušéske, savó sykavéla napatyv ke javír manušá, priléla ladžaipén pe péste; kodová manúš, kon bangiakirela čoré manušés, doreséla doš péske.

⁸Na sykáv bang kodoléske, savó sykavéla napatyv ke javír manušá, sob (kaj) jov te na bidykhel tut: sykáv bang godé manušéske i jov javéla te sykavél patýv túke.

⁹Podsykliakir godé manušés, i jov javéla godedyr, sykliákir čačuné (vorte) manušés i léste javéla butedýr džinybén.

¹⁰Angledýr trej te dares Rástyr-Devléstyr, sob (kaj) te javes godó: i džinybén pal Sventoné Raste-Devléste, déla xor rozlyiben (rozĥalyiben).

¹¹Me, godypén Rástyr-Devléstyr, davá butýr dyvesá túke te dživés, i davá butedýr beršá ke tyró džiibén.

¹²Kóli tu san godó, tu san godó vaš péske, kóli tu sykavesa bipatyv ke manušá, tu kokoró javésa te tugines (te piridžives) pal davá.

¹³Dylynin'ko džuvlý nahrates rakiréla; joj isyn prostone-godiakiri, i na džinéla nisó.

¹⁴I joj isyn bešty pašýl vudár lákire kheréskiro, ci pe banko pe vučé štéty dro fóro,

¹⁵sob (kaj) te kharel ke pe odolén, savé džána pašýl, savé džána mamúj péskire dromésa:

¹⁶Kon isyn nabaré-godiákiro, risjov adarík. Kodoléske, savó nábut ĥaljola, joj rakiréla:

¹⁷“Čordo paní isyn gudló, i maró, savó xána čorahanés, isyn drógo.”

¹⁸Ne kadalé manušá na džinéna, so myné manušá, kon gijá ke joi, so lákire gosti isyn xor pašté dro liúno (ado).