Read Biblija - Pe Baltitko Romani čib (Romanes) 2019 Baltic Romani Bible Ekliesiastos 1 Bible Online

Ekliesiastos 1 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 1

¹Jekliesiastoskire Davidóskire — čhavéskire lavá, Jerusalimóskire kralískire, kon sykliakirdiá pal Devléste.

²“Harnypén (sujéta) xarnypnastyr”, — rakiréla Jekliesiasto (Sykliakiribnáskiro) pal Devléste-xarnypén xarnypnastyr. Saró isyn xarnypén.”[1]

³Savó kófo (l'ĥota) isyn manušéske saré léskire pharé butiátyr, so jov keréla butý pharés tel kham.

⁴Jekh ródo džála péske, i javír ródo javéla, ne phuv jačélape pe saré viéki.

⁵Kham uštéla, i kham džála telé, i sýges risjola ke dová štéto, katýr jov uštyjá.

⁶Balvál phurdela ke paš-dyvesýtko (taty) rig, i joj risjola pe paš-ratítko (šylaly) rig: balvál usady (sak) obrisjola trusciál, i joj risjola pale pe péskire krugi.

⁷Saré réki (leniá) thadena dro mórjo (derjáv), ne mórjo (derjáv) usajékh nane pherdó: ke dolé štéty, karik réki (leniá) thadena, i odothýr rekakire (leniakire) paniá risjona, sob (kaj) nevéstyr te thaden.

⁸Saró, so isyn dro svéto (lot), isyn pharé butiátyr: nijékh manúš naštý te vyphenel saró. Jakh isyn na čaly dykhibnastyr, i kan isyn na pherdó šunybnastyr.

⁹Dová, so sys, javéla nevéstyr; i dová, so kerdiápe, javéla nevéstyr te kerélpe: i nane nisó nevó tel kham.

¹⁰Ci isyn vari-so, pal so saštý te phenés: “Dykh, ci davá isyn nevó?” Davá sys dre ĥaratuné beršá, so sys angíl aménde.

¹¹Nijékh manúš na ripirela dová, so sys angíl léste, nijékh, kon iščo (inké) javéla, na javéla te ripirel pal dová, so iščo (inké) javéla angíl.

¹²Me, Jekliesiasto, Devléskiro sykliakiribnáskiro, sómas králi pe Izrailjo dro Jerusalimo.

¹³Me riskirdjom péskiro iló te rodav, i te rozĥaljovav godypnasa saró, so kerélape tel bolybén: dasavo pharó zadyiben Devél dyjá manušéngire čhavénge, sob (kaj) jone dalésa te zalenpe pharés.

¹⁴Me dykhcjom saré butiá, so kerénape tel kham, i, ake — saró isyn ivjá i tradelape balvaliasa.

¹⁵So isyn bangó, naštý te javél mamúj (priames); i dová, so nane, naštý te gines.

¹⁶Me phendjom péskire ileske: “Dykh! Me jacjom baré manušésa i jacjom godedyr saré manušéndyr, kon sys angíl mánde dro Jerusalimo. Mánde isyn baró godypén i džinybén.”

¹⁷I me riskirdjom péskiro iló te džináv butýr pal godypén; so isyn bigodiakiriben i dylnypén. Me ĥalyjom angíl, so davá isyn adiáke-pac', sýrby te tradespe pal balvál.

¹⁸Pal-dová so, kaj isyn baró godypén, odój isyn baró kalypén pe iló i kon pribarjakirela džinybén, kodoleskiro dúho (fáno) butýr peréla.