Read Biblija - Pe Baltitko Romani čib (Romanes) 2019 Baltic Romani Bible Ekliesiastos 10 Bible Online

Ekliesiastos 10 - Biblija - Pe Baltitko Romani čib (Romanes) 2019 Baltic Romani Bible bible

Ekliesiastos 10

¹Mulé matlia (muhi) došakirena aptiekaroskiro drab te khosen adiáke, so davá kuč drab léla te khandel kirnypnasa;

²adiáke-pac' i jekh tyknó dylnypén keréla patyvalé manušésa, kon isyn godó i savés javír manušá kutiakirena.

³I davá adiáke-pac' isyn: kiéli dylynin'ko manúš džála vari-savé dromoresa; léske saroiekh na uhtyléla (nádosi) godypén, i jov sykavéla kažnoné manušéske, so jov isyn dylynin'ko.

⁴Kóli theméskire-barydyreskiro dúho (fáno) ĥazdélape proti túte, na jačkiv (na jačav) péskiro štéto, pal-dová so ramánjo (miro) barydyrésa čhakirela štylés baré gréhi.

⁵Davá isyn bibáht, so me dykhcjom tel kham, syr themeskiro barydyró délape dukhá.

⁶Dylnypén čhuvélape angíl baré patyvása; barvalé manušá isyn bešté pe telatuné štéty.

⁷Me dykhcjom dynar'jén pe grénde, i kralískire čhavén, savé psiréna pezal pir phuv syr dynárja.

⁸Kon ĥanavela ĥanbín, odová peréla dre láte, i kon phagiréla telé tyno, odolés sap dandyrela.

⁹Kon vyphagirela bará, odolés bar moginéla te pekavel pale; kon pharavela kaštá, odolés kašt moginéla te dukhavel.

¹⁰Kóli tover isyn tempo, i kóli kon na vostrinela čhinybnytko (liezvijo), to manušéske trej butýr te pričhuvel zor. Fedýr godypnasa te dumines pal davá angíl.

¹¹Kóli sap dandyrela manušés angíl, syr te zarakires les, tedy ukrotitieljo uže na trej.

¹²Lavá godé-manušéngire uštendyr isyn bahtalypén, ne dylynin'koneskire uštá sýrby nakhavena les kokores.

¹³Léskiro muj léla te rakirél nagode lavá, ne dro kónco (dro jagóro) jov rakiréla sýrby bišereskiro.

¹⁴I rakiréla but lavá dylynin'ko, ne nijékh manúš na džinéla, so javéla angíl, kon moginéla te phenél léske?

¹⁵Dylynin'ka manušá khiniakirena pes pharé butiasa adiáke, so jone na džinéna, syr te džán pe fóro.

¹⁶Bida túke, phuv, kóli tyró králi isyn terné-beršengiro i, kiéli tyré thagárja (kniázi) [kralískire čhavé-ju.o.] xána tasiárles (ránes).

¹⁷Bahtalý tu san, phuv, kóli tyró králi isyn baré-rangire rodóstyr i tyré thagárja (kniázi) xána tedy, kiéli trej vaš zoralypén, a na vaš matyben.

¹⁸Pal drieván kirne-masengire vastá kheréskiro karkaso peréla, i pir čuče vastá kher thadéla.

¹⁹Habén isyn kerdó, sob (kaj) te sanpe, i mol rozradynela džiibén, pe pal lové saštý te les saró davá.

²⁰Na prokoš kralís až i dre godý, na prokoš barvalen dre štúba, kaj sovesa; pal-dová so čirikly dro fáno (vozduho) moginéla te lydžál tyró lav [zan-ju.o.], i vurniaibnytko phakenca sozdyiben (krylato) phenéla pal davá réndo.